Muqeddes Kalam (latin yéziq) Pend-nesihetler 11

1 Yalghan taraza Perwerdigargha yirginchliktur;

Adil jing téshi Uni xursen qilar.■

2 Tekebburluq bilen birge shermendichilik egiship kéler;

Lékin danaliq kichik péillargha hemrah bolar.■

3 Toghrilarning semimiyliki özini yétekler;

Lékin kazzaplarning egriliki özini weyran qilar.■

4 Xudaning ghezep künide mal-dunyaning paydisi bolmas;

Lékin heqqaniyet ademni ölümdin qutquzar.■

5 Kamil ademning heqqaniyliqi özini tüz yolgha bashlar;

Yaman adem öz yamanliqidin yiqilar.

6 Durus ademlerning heqqaniyliqi özlirini qutquzar;

Lékin kazzaplar öz hiyle-neyringidin tutular.

7 Rezil adem ölse, uning ümidi yoqqa chiqar;

Gunahkarning ümidi axiri quruq qalar.□

8 Heqqaniy adem qiyinchiliqtin xaliy qilinar;

Rezil adem uning ornigha tutular.■

9 Munapiqlar öz aghzi bilen yéqinini buzar;

Lékin heqqaniylar bilimi bilen qutquzular.

10 Heqqaniy adem ronaq tapsa, sheher xush bolar;

Rezil adem halak bolsa, xelq tentene qilar.

11 Toghrilarning beriket tileshliri bilen sheher gülliner;

Lékin rezillerning tili bilen weyran bolar.

12 Öz yéqinini sökidighan kishi — eqilsizdur;

Emma yorutulghan adem aghzini yighar.

13 Gep toshughuchi mexpiyetlerni ashkarilar;

Sadiq adem amanetke xiyanet qilmas.

14 Yolyoruq kem bolsa, el-yurt yiqilar;

Ulugh bir meslihetchi bolsa, el nijat tapar.□ ■

15 Yatqa borun bolghan kishi ziyan tartmay qalmas;

Qol bériship képil bolushni yaman körgen kishining quliqi tinch bolar.□

16 Shapaetlik ayal izzet-hörmetni qoldin bermes;

Zorawanlar bayliqni qoldin bermes.

17 Rehimdil öz-özige bext yaritar;

Rehimsiz öz ténini aghritar.

18 Yaman ademlerning alghan ish heqqi ularni aldar, beriketsiz bolar;

Emma heqqaniyet térighuchi adem emeliy in’am alar.□

19 Heqqaniyet ademge hayatliq tapquzar;

Yamanliqni közlep yüridighan kishi ölümge yüz tutar.

20 Niyiti buzuq kishi Perwerdigargha yirginchliktur;

Emma yoli diyanetlik kishiler uning xursenlikidur.

21 Qol tutushup birleshsimu, yamanlar jazagha tartilmay qalmas;

Lékin heqqaniylarning nesli nijat tapar.□ ■

22 Chirayliq emma tétiqsiz xotun,

Choshqining tumshuqigha altun halqa salghandektur.

23 Heqqaniylarning arzusi peqet yaxshi méwe élip kéler;

Yamanlarning kütkini ghezep-neprettur.

24 Biraw merdlerche tarqatsimu, gülliner;

Yene biraw bérishke tégishlikini ayisimu, peqet namratlishar.

25 Merd adem etliner;

Bashqilarni sugharghuchi özimu sughirilar.■

26 Ashliqni satmay bésiwalghan kishi elning lenitige uchraydu;

Lékin ashliqni sétip bergüchige beriket tiliner.

27 Yaxshiliqni izdep intilgen adem shapaet tapar;

Yamanliqni izdigen adem özi yamanliq körer.■

28 Öz mal-duniyasigha tayan’ghuchi yiqilar;

Heqqaniy kishi yopurmaqtek kökirer.■

29 Öz öyige azarchiliq salghan kishi shamalgha miras bolar;

Eqilsiz adem aqilanining quli bolup qalar.

30 Heqqaniyning béridighan méwisi «hayatliq derixi»dur;

Dana kishi köngüllerni hayatliqqa mayil qilar.□

31 Qaranglar, heqqaniy adem bu dunyada sewenliki üchün bedel töligen yerde,

Reziller bilen gunahkarlarning aqiwiti qandaq bolar?□ ■

■11:1 Law. 19:36; Qan. 25:13; Pend. 16:11; 20:10,23

■11:2 Pend. 15:33; 16:18; 18:12

■11:3 Pend. 13:6

■11:4 Pend. 10:2; Ez. 7:19; Zef. 1:18

□11:7 «Gunahkarning ümidi...» — bashqa birxil terjimisi, «Küchlüklerning ümidi...».

■11:8 Zeb. 34:19; Pend. 21:18

□11:14 «Yolyoruq kem bolsa...» — bashqa birxil terjimisi, «Köp meslihetchiler bolsa,...». «...nijat tapar» — yaki «....bixeter turar».

■11:14 1Pad. 12:1-20

□11:15 «Yatqa borun bolghan kishi ziyan tartmay qalmas» — 6:1 we izahatni körüng.

□11:18 «Yaman ademlerning alghan ish heqqi ularni aldar, beriketsiz bolar» — ibraniy tilida «yaman ademning ish heqqi yalghan bolar».

□11:21 «Qol tutushup birleshsimu,...» — bashqa birxil terjimisi: — «shübhisizki,...».

■11:21 Pend. 16:5

■11:25 Zeb. 112:9; 2Kor. 9:9

■11:27 Zeb. 7:16; 9:15,16; 10:2; 57:6

■11:28 Zeb. 1:3, 4; 92:12-14

□11:30 «hayatliq derixi» — mushu yerde «hayatliq derixi» dégenlik, «Éren baghchisi»diki Adem’atimiz we Hawa’animizning behrimen bolushigha teyyarlan’ghan derexni körsitidu (3:18-ayetni körüng). «... hayatliqqa mayil qilar» — eyni tékistte «hayatliq» dégen söz yoq. Lékin heqqaniyliq yolida Xudaning mömin bendiliri ademlerning könglini özi üchün almaydu, belki ularni Xudaning yoligha jelp qilidu; shunga toluq menisi: «Kim dana bolsa kishilerning könglini nijat yoligha bashlaydu» dep qaraymiz. Mushu ayetni «Luqa» 5:10 bilen sélishturghili bolidu.

□11:31 «Qaranglar, heqqaniy adem ...bedel töligen yerde, reziller bilen gunahkarlarning aqiwiti qandaq bolar?» — bu ayet Injil, «1Pét.» 4:18de neqil keltürülidu.

■11:31 1Pét. 4:17,18