Muqeddes Kalam (latin yéziq) Pend-nesihetler 17

1 Qurbanliq göshlirige tolghan jédellik öydin,

Bir chishlem quruq nan yep, köngül tinchliqta bolghan ewzel.□ ■

2 Xizmetkar chéwer bolsa, xojisining nomusta qoyghuchi oghlini bashqurar;

Kelgüside u xojining oghli qatarida turup uning mirasni teqsim qilar.

3 Sapal qazan kümüshni tawlar, chanaq altunni tawlar,

Biraq ademning qelbini Perwerdigar sinar.■

4 Qebih kishi yaman sözlerge ishiner;

Yalghanchi pitnichilerning sözige qulaq salar.

5 Miskinlerni mesxire qilghuchi, özini Yaratquchini haqaretligüchidur;

Bashqilarning bextsizlikidin xushal bolghan kishi jazasiz qalmas.■

6 Qérilarning newriliri ularning tajidur;

Perzentlerning pexri ularning atiliridur.

7 Exmeq yarishiq gep qilsa uninggha yarashmas;

Mötiwer yalghan sözlise uninggha téximu yarashmas.

8 Para — uni bergüchining neziride ésil bir göherdur;

Goya uni negila ishletse muweppeqiyetke érishidighandek.□

9 Bashqilarning xataliqini yoputup kechürgen kishi méhir-muhebbetni közler;

Kona xamanni sorighan kishi yéqin dostlarni düshmen qilar.

10 Aqilanige singgen bir éghiz tenbih,

Exmeqqe urulghan yüz derridin ünümlüktur.

11 Yamanlar peqet asiyliqni közler;

Uni jazalashqa rehimsiz bir elchi ewetiler.

12 Exmiqane ish qiliwatqan nadan kishige uchrap qalghandin köre,

Baliliridin ayrilghan éyiqqa yoluqup qalghan yaxshi.

13 Kimki yaxshiliqqa yamanliq qilsa,

Ishikidin bala-qaza néri ketmes.■

14 Jédelning bashlinishi tosmini su élip ketken’ge oxshaydu;

Shunga jédel partlashtin awwal talash-tartishtin qol üzgin.■

15 Yamanni aqlighan,

Heqqaniygha qara chaplighan,

Oxshashla Perwerdigargha yirginchliktur.■

16 Exmeqning köngli danaliqni etiwarlimisa,

Qandaqmu uning qolida danaliqni sétiwalghudek puli bolsun?□

17 Heqiqiy dost herdaim sanga muhebbet körsiter,

Heqiqiy qérindash yaman kününg üchün yardemge dunyagha kelgendur.

18 Eqilsiz kishi qol bérip,

Yéqini üchün képil bolidu.

19 Jédelge amraq gunahqa amraqtur;

Bosughini égiz qilghan halaketni izder.□ ■

20 Niyiti buzulghan yaxshiliq körmes;

Tilida heq-naheqni astin-üstün qilghuchi balagha yoluqar.

21 Bala exmeq bolsa, ata ghem-qayghugha patar;

Hamaqetning atisi xushalliq körmes.

22 Shad köngül shipaliq doridek ten’ge dawadur;

Sunuq roh-dil ademning yilikini qurutar.■

23 Chirik adem yeng ichide parini qobul qilar;

U adaletning yolini burmilar.□

24 Danaliq yorutulghan kishining köz aldida turar;

Biraq eqilsizning közi xiyalkeshlik qilip qutupta yürer.■

25 Galwang bala atini azabgha salar;

Uni tughquchiningmu derdi bolar.■

26 Heqqaniylargha jerimane qoyushqa qet’iy bolmas;

Emirlerni adaletni qollighini üchün dumbalashqa bolmas.□

27 Bilimi bar kishi kem sözlük bolar;

Yorutulghan adem qaltis éghir-bésiq bolar.□

28 Hetta exmeqmu az sözlise dana hésablinar;

Tilini tizginligen kishi danishmen sanilar.

□17:1 «Qurbanliq göshliri» — ibraniylar ibadetxanida Xudagha atap soyghan bezi qurbanliq göshlirining köp qismini öyige ekilip yéyishke bolatti.

■17:1 Pend. 15:17

■17:3 Pend. 27:21; Yer. 17:10

■17:5 Pend. 14:31

□17:8 «Para — ...goya uni negila ishletse muweppeqiyetke érishidighandek» — bu ayet hejwiy, kinayilik söz bolup, omumiy emma epsuslinarliq bir ehwalni körsitidu; elwette, u bu ishni teriplimeydu. Bashqa birxil terjimisi: «U buni negila ishletsem muweppeqiyetke érishimen, deydu».

■17:13 Qan. 32:35; Pend. 20:22; 24:29; Rim. 12:17; 1Tés. 5:15; 1Pét. 3:9

■17:14 Pend. 20:3

■17:15 Mis. 23:7; Pend. 24:24; Yesh. 5:23

□17:16 «Exmeqning köngli danaliqni etiwarlimisa,...» — ibraniy tilida «Eqmeqning héch köngli yoq tursa,...»

□17:19 «Bosughini égiz qilghan (kishi)» — ibraniy tilida «Derwazisini égiz qilghan (kishi)». Bundaq adem belkim özining bay ikenlikini köz-köz qilmaqchi bolidu.

■17:19 Pend. 16:18

■17:22 Pend. 15:13

□17:23 «Chirik adem yeng ichide parini qobul qilar» — ibraniy tilida «Chirik adem baghrida parini qobul qilar...» yaki «Chirik adem baghirdin parini alar...».

■17:24 Top. 2:14; 8:1

■17:25 Pend. 10:1; 15:20; 19:13

□17:26 «jerimane qoyush» — «jerimane qoyush»ning «jazalash» dégen omumiy menisimu bolushi mumkin. «Heqqaniylargha jerimane qoyushqa qet’iy bolmas» — ibraniy tilida «Heqqaniylargha jerimane qoyushqa yaxshi emes».

□17:27 «qaltis éghir-bésiq bolar» — ibraniy tilida «salqin rohi bar» dégenni bildüridu.