1 Mǝn ǝgǝrdǝ bu dunyadiki kixilǝr sɵzlǝwatⱪan ⱨǝrhil tillar ⱨǝtta pǝrixtilǝrning tilliri bilǝnmu sɵzliyǝlǝydiƣan bolsammu, biraⱪ mǝn meⱨir-muⱨǝbbǝtsiz bolsam, u qaƣda mǝn pǝⱪǝt bir «dang-dang» ⱪilidiƣan mis dang, bir «qang-qang» ⱪilidiƣan qang bolup ⱪalimǝn, halas.□«Mǝn ǝgǝrdǝ bu dunyadiki kixilǝr sɵzlǝwatⱪan ⱨǝrhil tillar ⱨǝtta pǝrixtilǝrning tilliri bilǝnmu sɵzliyǝlǝydiƣan bolsammu...» — demǝk, «xundaⱪ intayin küqlük roⱨiy iltipat mǝndǝ bolsimu,...». Bu ayǝttin yǝnǝ xundaⱪ deyǝlǝymizki, ⱨǝⱪiⱪǝtǝn Hudadin kǝlgǝn ⱨǝrbir «namǝlum til» ǝmǝliyǝttǝ dunyadiki mǝlum bir millǝtning tili yaki pǝrixtilǝrning tilidur. 2 Əgǝr mǝn pǝyƣǝmbǝrlik ⱪilalisam, barliⱪ sirlar, barliⱪ bilimlǝrni qüxinip bolƣan bolsammu, ⱨǝm xuning bilǝn bir waⱪitta taƣlarni yɵtkiyǝligüdǝk toluⱪ ixǝnqtǝ bolsammu, ǝmma mǝndǝ meⱨir-muⱨǝbbǝt bolmisa, undaⱪta mǝn ⱨeqnǝrsǝ bolmiƣan bolimǝn.■Mat. 7:22; 17:20; 21:21; Mar. 11:23; Luⱪa 17:6; Rim. 12:7. 3 Əgǝr barliⱪ mal-mülkümni sǝdiⱪigǝ atap ⱨǝm tenimni Hudaning yolida ⱪurbanliⱪ süpitidǝ kɵydürülüxkǝ sunƣan tǝƣdirdimu, ǝmma mǝndǝ yǝnila meⱨir-muⱨǝbbǝt bolmisa, undaⱪta mening ⱨeqⱪandaⱪ paydam yoⱪ bolƣan bolidu.

4 Muⱨǝbbǝt sǝwr-taⱪǝtlik bolux ⱨǝm meⱨribanliⱪtur;

Muⱨǝbbǝt ⱨǝsǝthorluⱪ ⱪilmaydu:

Muⱨǝbbǝt ɵzini mahtimaydu,

Tǝkǝbburluⱪ ⱪilmaydu,■Pǝnd. 10:12; 1Pet. 4:8.

5 Nomussizliⱪ ⱪilmaydu,

Ɵz mǝnpǝǝtini kɵzlǝp yürmǝydu,

Teriktürülmǝydu,

Kɵnglidǝ ɵqmǝnlik saⱪlimaydu;■1Kor. 10:24; Fil. 2:4.

6 Ⱨǝⱪⱪaniysizliⱪtin huxal bolmaydu,

Bǝlki ǝmǝliyǝttin, ⱨǝⱪiⱪǝttin huxal bolidu;■2Yuⱨa. 4.

7 ⱨǝmmǝ ixta ⱪorsiⱪi kǝnglik ⱪilidu, ⱨǝmmigǝ yüzlinip Hudaƣa ixinidu, ⱨǝmmǝ ixⱪa ümid baƣlaydu, ⱨǝmmigǝ qidaydu.□«Ⱨǝmmǝ ixta ⱪorsiⱪi kǝnglik ⱪilidu...» — yaki «ⱨǝmmǝ ixni yapidu...» — demǝk, mumkin bolsa baxⱪilarning sǝwǝnlik-gunaⱨlirini qitⱪa yaymaydu.

8 Meⱨir-muⱨǝbbǝt ⱨǝrgiz ahirlaxmaydu. Bexarǝtlǝr bolsa, karƣa kǝlmǝydu: «namǝlum tillar» bolsa, tügǝydu: mɵjizilik bilimlǝrmu karƣa kǝlmǝydu. 9 Qünki bizning bilidiƣanlirimiz ⱪismǝn, bexarǝt beridiƣanlirimiz ⱪismǝn; 10 lekin mukǝmmǝllik kǝlgǝndǝ, ⱪismǝnlik yoⱪilidu. 11 Mǝn kiqikimdǝ balilarqǝ sɵzlidim, balilarqǝ oylidim, balilarqǝ ⱨesablidim; qong bolƣinimda, mǝn baliliⱪni taxlidim. 12 Qünki biz ⱨazir bir tutuⱪ derizidin müjmǝl ⱨalda kɵrimiz, lekin xu qaƣda yüzmuyüz kɵrimiz: Ⱨazir mǝn ⱪismǝn tonuymǝn, xu qaƣda mǝn Huda meni tonup keliwatⱪandǝk tonuymǝn.■2Kor. 3:18.

13 Ⱨazir ixǝnq, ümid, meⱨir-muⱨǝbbǝttin ibarǝt bu üq nǝrsǝ turuptu; bulardin ǝng üstün turidiƣini meⱨir-muⱨǝbbǝttur.