Muqeddes Kalam (latin yéziq) Ayup 12

Ayup yene söz qilidu •••• «Xudaning küch-qudriti, Uning adilliqi we körünüshte bolghan adilsizliqi»

1 Ayup jawaben mundaq dédi: —

2 Siler berheq el-ehlisiler!

Ölsenglar hékmetmu siler bilen bille kétidu!

3 Méningmu silerdek öz eqlim bar,

Eqilde silerdin qalmaymen;

Bunchilik ishlarni kim bilmeydu?!

4 Men öz dostlirimgha mazaq obyékti boldum;

Mendek Tengrige iltija qilip, duasi ijabet bolghan kishi,

Heqqaniy, durus bir adem mazaq qilindi!■

5 Rahette olturghan kishiler könglide herqandaq külpetni nezirige almaydu;

Ular: «Külpetler putliri teyilish aldida turghan kishigila teyyar turidu» dep oylaydu.□

6 Qaraqchilarning chédirliri awatlishidu;

Tengrige haqaret keltüridighanlar aman turidu;

Ular özining ilahini öz alqinida kötüridu.□ ■

7 Emdi haywanlardinmu sorap baq,

Ular sanga ögitidu,

Asmandiki uchar-qanatlarmu sanga deydu;

8 We yaki yer-zémin’gha gep qilsangchu,

Umu sanga ögitidu;

Déngizdiki béliqlar sanga söz qilidu.

9 Bularning hemmisini Perwerdigarning qoli qilghanliqini kim bilmeydu?

10 Barliq jan igiliri, barliq et igiliri,

Jümlidin barliq insanning nepisi uning qolididur.

11 Éghizda taamni tétighandek,

Qulaqmu sözining toghriliqini sinap baqidu emesmu?■

12 Yashan’ghanlarda danaliq rast tépilamdu?

Künlirining köp bolushi bilen yorutulush kélemdu?

13 Uningdila danaliq hem qudret bar;

Uningdila yolyoruq hem yorutush bardur.□

14 Mana, U xarab qilsa, héchkim qaytidin qurup chiqalmaydu;

U qamap qoyghan ademni héchkim qoyuwételmeydu.■

15 Mana, U sularni toxtitiwalsa, sular qurup kétidu,

U ularni qoyup berse, ular yer-zéminni bésip weyran qilidu.

16 Uningda küch-qudret, chin hékmetmu bar;

Aldighuchi, aldan’ghuchimu uninggha tewedur.

17 U meslihetchilerni yalingach qildurup, yalap élip kétidu,

Soraqchilarni reswa qilidu.■

18 U padishahlar el-ehlige salghan kishenlerni yéshidu,

Andin shu padishahlarni yalingachlap, chatraqlirini lata bilenla qaldurup shermende qilidu.□

19 U kahinlarni yalingayagh mangdurup élip kétidu;

U küch-hoquqdarlarni aghduridu.□

20 U ishenchlik qaralghan zatlarning aghzini étidu;

Aqsaqallarning eqlini élip kétidu.■

21 U aqsöngeklerning üstige haqaret tökidu,

U palwanlarning belwéghini yéship ularni küchsiz qilidu.□ ■

22 U qarangghuluqtiki chongqur sirlarni ashkarilaydu;

U ölümning sayisini yorutidu.■

23 U el-yurtlarni ulughlashturidu hem andin ularni gumran qilidu;

El-yurtlarni kéngeytidu, ularni tarqitidu.■

24 U zémindiki el-jamaetning kattiwashlirining eqlini élip kétidu;

Ularni yolsiz desht-bayawanda sersan qilip azduridu.■

25 Ular nursizlandurulup qarangghuluqta yolni silashturidu,

U ularni mest bolup qalghan kishidek galdi-guldung mangduridu.

Ayup
<
12
>

■12:4 Ayup 16:10; 17:2; 21:3; 30:1; Pend. 14:2

□12:5 «Rahette olturghan kishiler... : «külpetler putliri teyilish aldida turghan kishigila teyyar turidu» dep oylaydu» — esli tékistni chüshinish sel tes. Bashqa xil terjimilirimu uchrishi mumkin.

□12:6 «Ular özining ilahini öz alqinida kötüridu» — démek, ular butpereslar. Bashqa bir xil terjimisi: «Tengri hetta ularning qoligha molchiliq béridu».

■12:6 Ayup 21:7; Zeb. 73:11, 12; Yer. 12:1; Hab. 1:3, 4

■12:11 Ayup 6:30; 34:3

□12:13 «Uningdila» — Xudadila, démekchi.

■12:14 Ayup 9:12; 11:10; Weh. 3:7

■12:17 2Sam. 15:31; 17:14,23; Yesh. 19:12; 29:14; 1Kor. 1:19

□12:18 «U padishahlar el-ehlige salghan kishenlerni yéshidu, andin shu padishahlarni yalingachlap, ... shermende qilidu» — mushu padishahlar mustebit bolushi natayin; ular puqrilargha salghan kishenlerni belkim adilliq bilen salghan bolushi mumkin. Bashqa birnechche xil terjimilirimu uchrishi mumkin.

□12:19 «kahinlar» — xelqqe wakaliten qurbanliq qilghuchilar, ular üchün dua qilghuchilar.

■12:20 Ayup 32:9; Yesh. 3:2, 3

□12:21 «U aqsöngeklerning üstige haqaret tökidu, U palwanlarning belwéghini yéship ularni küchsiz qilidu» — mushu aqsöngek, palwanlar eslide melum bir gunah yaki zalimliqni qilghanliqi natayin. Ayup bu yerde: Xuda tashqi körünüshte sewebsiz halda bu ésilzade kishilerge herxil külpet chüshüridu hem shuning bilen bir waqitta, bashqa nurghun kishilerni qiyinchiliqqa duchar qilidu, démekchi bolghan bolushi mumkin. Chünki «aqsaqallarning eqli élip kétilgen» déyish arqiliq ularning meslihet béridighan ademliriningmu ehwalining xeterlik ikenlikidin bésharet béridu. Bu palaketler melum bir gunahdin chiqqan bolushimu yaki undaq bolmasliqimu mumkin. Ayupning yuqiriqi sözlirige qarighanda 23-25-ayetlerde déyilgen awatchiliq hem külpetler oxshashla yüz bergendek körinidu.

■12:21 Zeb. 107:40

■12:22 Mat. 10:26; 1Kor. 4:5

■12:23 Zeb. 107:38

■12:24 Zeb. 107:4-5, 40