89
89-küy •••• Hudaning Dawut üqün bekitkǝn mǝnggülük ǝⱨdisi — nemixⱪa mǝƣlubiyǝt ⱨǝm munⱪǝrzlik bolidu?
1 Əzraⱨliⱪ Etan yazƣan «Masⱪil»: —
Pǝrwǝrdigarning ɵzgǝrmǝs muⱨǝbbitini ǝbǝdiy küylǝymǝn,
Aƣzimda dǝwrdin-dǝwrgiqǝ ⱨǝⱪiⱪǝt-sadaⱪitingni ayan ⱪilimǝn. ◼«Əzraⱨliⱪ Etan yazƣan «Masⱪil»: — ...» — ǝgǝr bu «Etan» Dawut padixaⱨning dǝwridǝ yaxiƣan («1Pad.» 4:31-ayǝttiki «Etan») bolsa, bu küy bexarǝt boluxi kerǝk. Undaⱪ bolmisa Dawutning hanidani tǝhttin mǝⱨrum bolƣandin keyin (Babilda sürgün bolƣandin keyin) baxⱪa bir Etan yazƣan.
2 Qünki mǝn: Ɵzgǝrmǝs muⱨǝbbǝt mǝnggügǝ tiklinip mangidu,
Sǝn ⱨǝⱪiⱪǝt-sadaⱪitingni ǝrxiǝlada mustǝⱨkǝmlǝwatisǝn — dǝp bildim;
3 Sǝn dedingki: —
«Mǝn talliwalƣinim bilǝn ǝⱨdǝ tüzgǝnmǝn;
Ⱪulum Dawutⱪa ⱪǝsǝm ⱪildim: —
4 Sening ǝwladingni mǝnggü dawam ⱪildurimǝn,
Tǝhtingni ǝwladtin-ǝwladⱪa ⱪurup qiⱪimǝn».
Selaⱨ.
5 Ⱨǝm asmanlarmu Sening mɵjiziliringni tǝbriklǝydu, i Pǝrwǝrdigar,
Muⱪǝddǝslǝrning jamaitidǝ ular ⱨǝⱪiⱪǝt-sadaⱪitingni mǝdⱨiyilǝydu; ◼«Muⱪǝddǝslǝrning jamaitidǝ ular ⱨǝⱪiⱪǝt-sadaⱪitingni mǝdⱨiyilǝydu» — «muⱪǝddǝslǝr» ⱨǝm 6-ayǝttiki «ⱪudrǝt igisining oƣulliri» pǝrixtilǝrni kɵrsǝtsǝ kerǝk. ◘Zǝb. 19:1-2
6 Qünki asmanlarda Pǝrwǝrdigarning tǝngdixi barmu?
Ⱪudrǝt Igisining oƣulliri arisida Pǝrwǝrdigarƣa ohxaydiƣan kim bar?
7 Tǝngrining ⱨǝywisi muⱪǝddǝslǝrning mǝjlisidikilǝrni ⱪattiⱪ titritidu,
Uning ǝtrapidikilǝrning ⱨǝmmisi üqün U ⱪorⱪunqluⱪtur.
8 I Pǝrwǝrdigar, samawiy ⱪoxunlarning Sǝrdari bolƣan Huda,
Ⱨǝr tǝrǝpingda ⱨǝⱪiⱪǝt-sadaⱪiting tursa,
Ohxar Sanga kimmu hǝm?
9 Dengizning mǝƣrurluⱪi üstidin ⱨɵküm sürisǝn,
Dolⱪunlar ɵrkǝxligǝndǝ, sǝn ularni tinqlandurisǝn;
10 Raⱨabni ɵlgüdǝk yanjidingsǝn,
Küqlük biliking bilǝn düxmǝnliringni tiripirǝn ⱪilip tarⱪitiwǝtting. ◼«Raⱨabni ɵlgüdǝk yanjidingsǝn» — «Raⱨab» ⱨǝm dengiz ǝjdiⱨasi (jin-xǝytanlarning bir ipadisi) ⱨǝm Misirning bir lǝⱪimi idi. Mǝnisi «mǝƣrur»dur («Yǝx.» 30:7ni kɵrüng).
11 Asmanlar Seningki, zeminmu Seningkidur,
Jaⱨan ⱨǝm uningƣa tolƣan ⱨǝmmini bǝrpa ⱪilding. ◘Zǝb. 24:1, 2
12 Ximal wǝ jǝnubni, ularni yaratⱪansǝn,
Tabor wǝ Ⱨǝrmon qoⱪⱪiliri namingni yangritip küylǝr.
13 Ⱪudrǝtlik bilǝk Seningkidur;
Küqlüktur Sening ⱪolung, ong ⱪolung ⱨǝm qidamliⱪtur.
14 Tǝhtingning uli ⱨǝⱪⱪaniyliⱪ ⱨǝm adalǝttur,
Muⱨǝbbǝt ⱨǝm ⱨǝⱪiⱪǝt-sadaⱪǝt daim didaring aldida mangidu. ◘Zǝb. 85:13; 97:2
15 Tǝntǝnǝ sadasini bilgǝn hǝlⱪ bǝhtliktur;
Ular Sening jamalingning nurida mangidu, i Pǝrwǝrdigar! ◼«Tǝntǝnǝ sadasi» — yaki «Ƣalibiyǝtning warⱪirixi», yaki «Ⱨeytliⱪ tǝntǝnilǝr».
16 Ular namingda kün boyi xad bolar,
Ⱨǝⱪⱪaniyliⱪingda ular kɵtürüldi.
17 Qünki ularning küqining xan-xǝripi ɵzüngdursǝn,
Sening iltipating bilǝn münggüzimiz kɵtürülidu. ◼«Sening iltipating bilǝn münggüzimiz kɵtürülidu» — «münggüz» mǝlum ǝlning yaki adǝmning xan-xǝripini, küq-ⱪudritini bildüridu.
18 Qünki Pǝrwǝrdigar bizning ⱪalⱪinimiz,
Israildiki Muⱪǝddǝs Bolƣuqi Xaⱨimizdur. ◼«Qünki Pǝrwǝrdigar bizning ⱪalⱪinimiz, Israildiki Muⱪǝddǝs Bolƣuqi Xaⱨimizdur» — baxⱪa birhil tǝrjimisi: «Qünki ⱪalⱪinimiz Pǝrwǝrdigardin, Xaⱨimiz Israildiki Muⱪǝddǝs Bolƣuqidindur».
19 Sǝn burun Ɵz mɵmin bǝndǝnggǝ ƣayibanǝ alamǝttǝ kɵrünüp sɵz ⱪilip xundaⱪ degǝnidingsǝn: —
«Mǝn bir ǝzimǝt üstigǝ yardimimni ⱪondurdum,
Əl arisidin Mǝn talliwalƣan birsini kɵtürdüm; ◼«Sǝn burun Ɵz mɵmin bǝndǝnggǝ ƣayibanǝ alamǝttǝ kɵrünüp sɵz ⱪilip xuni degǝnidingsǝn...» — bu toƣruluⱪ «2Sam.» 7:8-17ni kɵrüng.
20 Ⱪulum Dawutni taptim,
Muⱪǝddǝs meyim bilǝn Mǝn uni mǝsiⱨ ⱪilip tiklidim. ◘1Sam. 16:1,13
21 Ⱪolum uningƣa yar boluxⱪa bekitilgǝn,
Bilikim uni küqlǝndüridu.
22 Düxmǝn uningdin ⱨeq alwan-seliⱪ almaydu,
Pǝskǝx adǝm uni ⱪistimaydu; ◘2Sam. 7:10
23 Bǝlki Mǝn rǝⱪiblirini uning aldida yanjiymǝn,
Uni ɵq kɵrgǝnlǝrni yǝr bilǝn yǝksan ⱪilimǝn;
24 Ɵz ⱨǝⱪiⱪǝt-sadaⱪitim ⱨǝm meⱨir-muⱨǝbbitim uningƣa yar bolar,
Ⱨǝm Mening namim bilǝn uning münggüzi kɵtürülidu. ◼«...uning münggüzi kɵtürülidu» — Tǝwratta, «münggüz»lǝr kɵp ⱨallarda adǝmlǝrning abruy-xɵⱨriti yaki küq-ⱪudritini bildüridu
25 Mǝn uning ⱪolini dengiz üstidǝ,
Ong ⱪolini dǝryalar üstidǝ ⱪoyimǝn.
26 U Meni qaⱪirip dǝyduki: —
«Sǝn mening Atam, mening Tǝngrim,
Nijatliⱪim bolƣan ⱪoram teximdursǝn!». ◘2Sam. 7:14; Ibr. 1:4, 5
27 Mǝn yǝnǝ uni Mening tunji oƣlum dǝp,
Dunya padixaⱨliridin ǝng yuⱪurisi ⱪilimǝn. ◘Zǝb. 2:7; 72:11; Kol. 1:15-18
28 Mening muⱨǝbbitimni uning üqün ǝbǝdiy ⱪaldurimǝn,
Mening ǝⱨdǝm uning bilǝn mǝⱨkǝm turidu;
29 Mǝn uning nǝslini ǝbǝdiylǝxtürimǝn,
Uning tǝhtini asmanning künliridǝk dawam ⱪildurimǝn.
30 Mubada oƣulliri Tǝwrat-ⱪanunumdin qiⱪip,
Ⱨɵkümlirim boyiqǝ yürmisǝ, ◘2Sam. 7:14
31 Bǝlgilimilirimni buzsa,
Əmrlirimgǝ itaǝt ⱪilmisa,
32 — U waⱪitta itaǝtsizlikini tayaⱪ bilǝn,
Gunaⱨini yara-jaraⱨǝt bilǝn jazalaymǝn.
33 Lekin muⱨǝbbitimni uningdin üzüp ⱪoymaymǝn,
Ⱨǝⱪiⱪǝt-sadaⱪitimgǝ hiyanǝt ⱪilmaymǝn;
34 Mǝn tüzgǝn ǝⱨdǝmni ǝsla buzmaymǝn,
Lǝwlirimdin qiⱪⱪanlirini ⱨeq ɵzgǝrtmǝymǝn.
35 Mǝn bir ⱪetim pak-muⱪǝddǝslikimgǝ ⱪǝsǝm iqtim —
Dawutⱪa ⱪǝti yalƣan sɵzlimǝymǝn: — ◘Ibr. 6:13,17,18
36 «Uning ǝwladi ǝbǝdiy dawamlixar;
Uning tǝhti kɵz aldimdiki ⱪuyax kǝbi turar; ◘Mat. 27:45
37 U ay kǝbi mǝnggülük mustǝⱨkǝmlinǝr,
Asmandiki turƣun guwaⱨqidǝk mǝzmut turar».
38 Biraⱪ Sǝn bularni qǝtkǝ ⱪeⱪip, tenip kǝtting;
Sǝn mǝsiⱨ ⱪilƣan padixaⱨⱪa ⱪattiⱪ ƣǝzǝplǝnding. ◘Zǝb. 22:1; Mat. 27:46; Yǝx. 53:3-6, 10
39 Ⱪulung bilǝn tüzgǝn ǝⱨdidin waz kǝqting,
Uning tajini yǝrgǝ taxlap daƣ tǝgküzdung.
40 Uning barliⱪ tam-pasillirini yiⱪitip,
Ⱪǝl’ǝlirini harabilikkǝ aylandurdung. ◘Zǝb. 80:12-13
41 Yoldin ɵtüwatⱪanlarning ⱨǝmmisi uni bulimaⱪta,
U barliⱪ ⱪoxniliri aldida rǝswa boldi. ◘Zǝb. 80:12-13
42 Uni ǝzgǝnlǝrning ong ⱪolini yuⱪiri kɵtürdüng,
Pütkül düxmǝnlirini huxal ⱪilding.
43 Bǝrⱨǝⱪ, Sǝn uning ⱪiliqining bisini ⱪayriwǝtting,
Jǝngdǝ uni tik turƣuzmiding.
44 Uning julaliⱪini yoⱪitip,
Uning tǝhtini ɵrüwǝttingsǝn. ◘Yǝx. 53:7-8
45 Yaxliⱪ künlirini Sǝn ⱪisⱪartting,
Uni hijalǝtkǝ qɵmdürdüng.
Selaⱨ.
46 Ⱪaqanƣiqǝ, i Pǝrwǝrdigar?
Ɵzüngni ǝbǝdiy yoxuruwerǝmsǝn?
Ⱪǝⱨring ot kǝbi mǝnggü yanarmu?
47 Manga nisbǝtǝn, ɵmürning ⱪis ikǝnlikini ǝstǝ tutⱪin!
Nemixⱪimu barliⱪ insan balilirini biⱨudilikkǝ yaratⱪansǝn?
48 Ⱪeni, ⱪaysi adǝm yaxap ɵlümni kɵrmǝydikǝn?
U jenini tǝⱨtisaraning qanggilidin ⱪutⱪuzalamdikǝn?
Selaⱨ. ◘Zǝb. 49:6-12, 15
49 Sǝn ⱨǝⱪiⱪǝt-sadaⱪitingdǝ Dawutⱪa ⱪǝsǝm iqkǝn,
Awwalⱪi meⱨir-muⱨǝbbǝtlǝr ⱪǝyǝrdǝ ⱪaldi, ya Rǝbbim? ◘2Sam. 7:15
50 Ⱪulliring uqrawatⱪan mǝshirilǝrni yad ǝtkǝysǝn, i Rǝb —
Mǝn iqimdǝ pütkül küqlük ǝllǝrning mǝsⱨirǝ-mazaⱪlirini kɵtürüp yürimǝn —
51 Düxmǝnliringning Ɵzüng mǝsiⱨ ⱪilƣanning ⱪǝdǝmlirini ⱪanqilik mǝshiriliginini,
I Pǝrwǝrdigar, yad ǝtkǝysǝn!
52 Pǝrwǝrdigarƣa mǝnggügǝ tǝxǝkkür-mǝdⱨiyǝ ⱪayturulsun!
Amin! Amin!
◼89:1 «Əzraⱨliⱪ Etan yazƣan «Masⱪil»: — ...» — ǝgǝr bu «Etan» Dawut padixaⱨning dǝwridǝ yaxiƣan («1Pad.» 4:31-ayǝttiki «Etan») bolsa, bu küy bexarǝt boluxi kerǝk. Undaⱪ bolmisa Dawutning hanidani tǝhttin mǝⱨrum bolƣandin keyin (Babilda sürgün bolƣandin keyin) baxⱪa bir Etan yazƣan.
◼89:5 «Muⱪǝddǝslǝrning jamaitidǝ ular ⱨǝⱪiⱪǝt-sadaⱪitingni mǝdⱨiyilǝydu» — «muⱪǝddǝslǝr» ⱨǝm 6-ayǝttiki «ⱪudrǝt igisining oƣulliri» pǝrixtilǝrni kɵrsǝtsǝ kerǝk.
◼89:10 «Raⱨabni ɵlgüdǝk yanjidingsǝn» — «Raⱨab» ⱨǝm dengiz ǝjdiⱨasi (jin-xǝytanlarning bir ipadisi) ⱨǝm Misirning bir lǝⱪimi idi. Mǝnisi «mǝƣrur»dur («Yǝx.» 30:7ni kɵrüng).
◘89:11 Zǝb. 24:1, 2
◼89:15 «Tǝntǝnǝ sadasi» — yaki «Ƣalibiyǝtning warⱪirixi», yaki «Ⱨeytliⱪ tǝntǝnilǝr».
◼89:17 «Sening iltipating bilǝn münggüzimiz kɵtürülidu» — «münggüz» mǝlum ǝlning yaki adǝmning xan-xǝripini, küq-ⱪudritini bildüridu.
◼89:18 «Qünki Pǝrwǝrdigar bizning ⱪalⱪinimiz, Israildiki Muⱪǝddǝs Bolƣuqi Xaⱨimizdur» — baxⱪa birhil tǝrjimisi: «Qünki ⱪalⱪinimiz Pǝrwǝrdigardin, Xaⱨimiz Israildiki Muⱪǝddǝs Bolƣuqidindur».
◼89:19 «Sǝn burun Ɵz mɵmin bǝndǝnggǝ ƣayibanǝ alamǝttǝ kɵrünüp sɵz ⱪilip xuni degǝnidingsǝn...» — bu toƣruluⱪ «2Sam.» 7:8-17ni kɵrüng.
◼89:24 «...uning münggüzi kɵtürülidu» — Tǝwratta, «münggüz»lǝr kɵp ⱨallarda adǝmlǝrning abruy-xɵⱨriti yaki küq-ⱪudritini bildüridu
◘89:26 2Sam. 7:14; Ibr. 1:4, 5
◘89:27 Zǝb. 2:7; 72:11; Kol. 1:15-18
◼89:37 «U ay kǝbi mǝnggülük mustǝⱨkǝmlinǝr, asmandiki turƣun guwaⱨqidǝk mǝzmut turar» — «asmandiki turƣun guwaⱨqi» yǝnǝ ayni kɵrsitiximu mumkin.
◘89:38 Zǝb. 22:1; Mat. 27:46; Yǝx. 53:3-6, 10
◘89:48 Zǝb. 49:6-12, 15