Muⱪeddes Kalam (yǝngi yeziⱪ) Zǝkǝriya 13

1 Xu küni Dawut jǝmǝti ⱨǝm Yerusalemda turuwatⱪanlar üqün gunaⱨni wǝ paskiniliⱪni yuyidiƣan bir bulaⱪ eqilidu.■

2 Xu küni xundaⱪ boliduki, — dǝydu samawi ⱪoxunlarning Sǝrdari bolƣan Pǝrwǝrdigar, — Mǝn mǝbudlarning namlirini zemindin yoⱪitimǝnki, ular yǝnǝ ⱨeq ǝslǝnmǝydu; wǝ Mǝn pǝyƣǝmbǝrlǝrni wǝ paskina roⱨnimu zemindin qiⱪirip yɵtkiwetimǝn. □ 3 Xundaⱪ ǝmǝlgǝ axuruliduki, birǝylǝn yǝnila pǝyƣǝmbǝrqilik ⱪilip bexarǝt berǝy desǝ, uning ɵzini tuƣⱪan ata-anisi uningƣa: «Sǝn ⱨayat ⱪalmaysǝn; qünki Pǝrwǝrdigarning namida yalƣan gǝp ⱪiliwatisǝn» dǝydu; andin ɵzini tuƣⱪan ata-anisi uni bexarǝt beriwatⱪinidila sanjip ɵltüridu. □ ■ 4 Xu küni xundaⱪ boliduki, pǝyƣǝmbǝrlǝrning ⱨǝrbiri ɵzliri bexarǝt beriwatⱪanda kɵrgǝn kɵrünüxtin hijil bolidu; ular hǝⱪni aldax üqün ikkinqi qupurluⱪ qapanni kiymǝydu; □ 5 U: «Mǝn pǝyƣǝmbǝr ǝmǝs, mǝn pǝⱪǝt teriⱪqimǝn; qünki yaxliⱪimdin tartip tupraⱪ bilǝn tirikqilik ⱪiliwatimǝn» — dǝydu. □ 6 Əmdi birsi uningdin: «Ⱨǝy, ǝmdi sening mǝydǝngdiki bu zǝhmǝtlǝr nemǝ?» — desǝ, u: «Dostlirimning ɵyidǝ yarilinip ⱪaldim» — dǝp jawab beridu.□

Ⱨǝⱪiⱪiy padiqining azab-oⱪubǝtliri wǝ nǝtijiliri toƣruluⱪ yǝnǝ bir bexarǝt

7 Oyƣan, i ⱪiliq, Mening padiqimƣa, yǝni Mening xerikim bolƣan adǝmgǝ ⱪarxi qiⱪ, — dǝydu samawi ⱪoxunlarning Sǝrdari bolƣan Pǝrwǝrdigar; — Padiqini uruwǝt, ⱪoylar patiparaⱪ bolup tarⱪitiwetilidu; Mǝn ⱪolumni kiqik peillarning üstigǝ qüxürüp turƣuzimǝn. □ ■ 8 Zeminda xundaⱪ ǝmǝlgǝ axuruliduki, — dǝydu Pǝrwǝrdigar, — üqtin ikki ⱪismi ⱪirilip ɵlidu; biraⱪ üqtin bir ⱪismi uningda tirik ⱪalidu. 9 Andin Mǝn üqinqi ⱪismini otⱪa kirgüzimǝn, ularni kümüx tawliƣandǝk tawlaymǝn, altun sinalƣandǝk ularni sinaymǝn; ular Mening namimni qaⱪirip nida ⱪilidu wǝ Mǝn ularƣa jawab berimǝn; Mǝn: «Bu Mening hǝlⱪim» dǝymǝn; ular: «Pǝrwǝrdigar mening Hudayim» — dǝydu.■

■13:1 Law. 16; 23:26-32; Zǝk.12:10-14; Rim. 11:26

□13:2 «Mǝn pǝyƣǝmbǝrlǝrni wǝ paskina roⱨnimu zemindin qiⱪirip yɵtkiwetimǝn» — bu pǝyƣǝmbǝrlǝr sahta pǝyƣǝmbǝrlǝr, ǝlwǝttǝ. Əmǝliyǝttǝ bolsa Mǝsiⱨ-Ⱪutⱪuzƣuqi dunyaƣa ⱪaytip kǝlgǝndin keyin pǝyƣǝmbǝrlǝrning ⱨeq ⱨajiti yoⱪ bolidu.

□13:3 «uning ɵzini tuƣⱪan ata-anisi uningƣa: «Sǝn ⱨayat ⱪalmaysǝn; qünki Pǝrwǝrdigarning namida yalƣan gǝp ⱪiliwatisǝn» dǝydu; andin ɵzini tuƣⱪan ata-anisi uni bexarǝt beriwatⱪinidila sanjip ɵltüridu» — Musa pǝyƣǝmbǝrgǝ qüxürülgǝn ⱪanun boyiqǝ sahta pǝyƣǝmbǝrlǝrni ɵltürüx kerǝk. Muxu adǝmning ata-anisi Hudadin xunqǝ ǝyminiduki, ɵz oƣlini nǝⱪ mǝydanda ɵltüridu.

■13:3 Ⱪan. 13:6-11, 18:20

□13:4 «ular hǝⱪni aldax üqün ikkinqi qupurluⱪ qapanni kiymǝydu» — Ilyas, Elixa wǝ Yǝⱨya pǝyƣǝmbǝrlǝr muxundaⱪ intayin addiy kiyim kiygǝn.

□13:5 «qünki yaxliⱪimdin tartip tupraⱪ bilǝn tirikqilik ⱪiliwatimǝn» — baxⱪa birhil tǝrjimisi: «qünki yaxliⱪimdin tartip mǝn adǝmning mǝdikari bolup kǝldim».

□13:6 «Əmdi birsi uningdin: «Ⱨǝy, ǝmdi sening mǝydǝngdiki bu zǝhmǝtlǝr nemǝ?» — desǝ, u: «Dostlirimning ɵyidǝ yarilinip ⱪaldim» — dǝp jawab beridu» — «mǝydǝngdiki zǝhmǝtlǝr» ibraniy tili boyiqǝ sɵzmusɵz alsaⱪ «ikki ⱪolung otturisidiki zǝhmǝtlǝr» bolidu. «Butpǝrǝs pǝyƣǝmbǝrlǝr» jin-xǝytanlarning diⱪⱪitini tartix üqün pat-pat ɵz tenini kesiwalatti wǝ ahirⱪi zamandimu xundaⱪ ⱪilixi mumkin («1Pad.», 18:28-ayǝttǝ misal kɵrülidu). Xuning bilǝn hǝlⱪ muxundaⱪ zǝhmǝtlǝrdin gumanlinidu, sahta pǝyƣǝmbǝr zǝhmǝtliridin hijil bolup roxǝn bir yalƣan baⱨanini kɵrsitidu.

□13:7 «Mǝn ⱪolumni kiqik peillarning üstigǝ qüxürüp turƣuzimǝn» — baxⱪa birhil tǝrjimisi: «Mǝn ⱪolumni kiqik peillar üstigimu ⱪarxi qüxürimǝn». Biraⱪ bizning tǝrjimimiz 8-ayǝtkǝ maslixidu; omumiy mǝnisi Huda Ɵzigǝ tǝwǝ kiqik peilliⱪlarni ⱪoƣdaydu.

■13:7 Ⱪan. 37:42; Yǝx. 26:20; Mat. 26:31; Mar. 14:27; Luⱪa 22:35-38; Yⱨ. 18:8

■13:9 Zǝb. 50:3-5, 15; 91:15; 144:15; Mal. 3:1-4; Yⱨ. 20:28; 1Pet. 1:6.