9
Da Peopo Tell Da Bad Tings Dey Wen Do
1 Octoba 31, da peopo meet one mo time. Dis time, dey no eat cuz dey like pray. Dey wear burmbag kine cloth fo show dey stay sad inside, an dey put dirt on top dea heads. 2 Da peopo from da Israel ohana stan one side, away from all da odda peopo dat not from dea. An da Israel peopo tell erybody da bad kine tings dey wen do, an wat dea ancesta guys wen do too. 3 Dey stan up right wea dey stay fo three hour, an read da book dat get da rules from Da One In Charge, dass dea God. An den, anodda three hour, dey stay tell erybody da bad kine tings dey do. An same time dey go down on top da groun fo show dea God, Da One In Charge, plenny love an respeck.
4 Da odda guys from da Levi ohana—Jeshua, Bani, Kadmiel, Shebaniah, Bunni, Sherebiah, da odda Bani, an Kenani—stay stan on top da steps dat go up to da stage, an dey talk real loud an strong, fo aks Da One In Charge, da God dey stay pray to, fo help dem.
Da Peopo Tink Bout
Da Good Tings God Do
Da Good Tings God Do
5 Den da main guys from da Levi ohana—dass Jeshua, Kadmiel, Bani, Hashabneiah, Sherebiah, Hodiah, Shebaniah, an Petahiah—dey tell da peopo, “Stan up! Tell erybody da good tings dat Da One In Charge do fo you guys. He stay da God fo you guys, from da time eryting wen start, an foeva an eva!”
So den one a dem talk to God lidis:
“We like tell erybody da good tings you do!
We know you one awesome God!
You do mo plenny good tings den us know how fo tell,
An you mo awesome den awesome!”
Da World
6 “You Da One In Charge, you da ony one!
You wen make da sky, an even da mos high part a da sky.
You wen make da sun an da moon an all da stars, jalike one army.
You wen make da world an eryting dat stay live on top.
You wen make da ocean an eryting dat stay inside dea.
You da one dat wen make all da animals an plants an fish an peopo stay alive,
An erybody dat stay inside da sky stay show you love an respeck!”
Abraham
7 ✡9:7 a: Start 11:31; 12:1; b: Start 17:5“You Da One In Charge,
Da God dat wen pick Abram
An bring um outa Ur town Babylon side.
Den you give um da name Abraham.
8 ✡9:8: Start 15:18-21You wen look inside Abraham heart an see,
Dat he da kine guy you can trus.
You make one deal wit him.
You tell him:
‘All da peopo dat goin come from you,
I goin give to dem, da land wea da Canaan peopo live,
An da Het peopo, da Amor peopo, da Periz peopo,
Da Jebus peopo, an da Girgash peopo.’
You do eryting jalike you wen promise fo do befo time.
Cuz you do wass right erytime.”
Outa Egypt
9 ✡9:9 a: Outa 3:7; b: Outa 14:10-12“You wen see how oua ancesta guys suffa plenny Egypt side.
You wen hear dem yell fo help by da Red Sea.
10 ✡9:10: Outa 7:8–12:32You wen do awesome kine tings fo show who you,
Tings dat blow oua mind,
Fo hurt Pharaoh an all his helpa guys
An all da odda peopo inside his land.
Cuz you know,
Dey ack jalike dey mo betta den anybody
An make any kine to oua ancesta guys.
Da awesome tings you wen do dat time,
Make you get one awesome name still yet today.
11 ✡9:11 a: Outa 14:21-29; b: Outa 15:4-5You open up da sea in front dem
Fo dem go inside da middo a da Red Sea
On top dry groun.
But da guys dat was chasing dem,
You throw dem down inside da deep watta,
Jalike wen you throw one rock inside da rough ocean.
12 ✡9:12: Outa 13:21-22Day time, had one cloud dat go from da groun to da sky,
Fo show da peopo wea fo go.
Nite time, had fire dat go from da groun to da sky,
Fo give um light fo see dea way, wea dey stay go.”
Da Rules
13 ✡9:13: Outa 19:18–23:33; John 6:3“Wen dey stay Mount Sinai,
You wen come down dea on top da mountain.
You talk to dem from outa da sky an da air.
You tell um da right tings fo do,
An teach um da Rules dat dey can trus.
An da good tings you tell um dey gotta do.
14 You let um know dat da Res Day stay spesho fo you.
You tell um wat dey gotta do an how dey gotta do um.
You wen make Moses teach um yoa Rules,
Cuz dat time, he da guy dat work fo you.
15 ✡9:15 a: Outa 16:4-15; b: Outa 17:1-7; c: Rules2 1:21Wen dey hungry, you give um bread outa da sky.
Wen dey thirsty, you make watta come outa one big rock fo dem.
You tell um fo come hea fo take ova dis land,
Cuz you wen make one strong promise befo time fo give um da land.”
Da Peopo No Lissen
16 ✡9:16: Census 14:1-4; Rules2 1:26-33“But dey oua ancesta guys,
Dey ack jalike dey get da right
Fo make any kine to God.
Dey come hard head, an no lissen
Wat God tell um fo do.
17 ✡9:17: Outa 34:6; Census 14:18“Dey tell, ‘No way us guys goin lissen wat God tell!’
Dey no even tink bout da awesome kine tings you do
Right dea in front dem.
Dey even come mo hard head fo go agains you,
An pick one leada guy fo bring dem back Egypt side
Fo come slave guys one mo time.
“But you, you one God dat no bodda you
Fo let da peopo go
Fo da bad kine tings dey do.
You get one big heart fo do good tings fo peopo.
You get pity fo peopo.
You take long time befo you get huhu.
You erytime stay tight wit yoa peopo.
Dass why you neva leave yoa peopo dat time,
18 ✡9:18: Outa 32:1-4Not even afta dey talk real bad bout you
An melt gold fo dem make one idol god
Dat look jalike one bebe cow,
An dey tell, ‘Dis idol, yoa God!
He da one dat wen bring you guys hea from Egypt!’
19 ✡9:19: Rules2 8:2-4“Cuz you get plenny pity fo dem still yet,
You neva go way an leave dem
Ova dea inside da boonies.
Da cloud dat go from da groun to da sky fo show um wea fo go
Neva go way from dem.
Nite time, da fire dat go from da groun to da sky
Give um light fo see da way dey goin go.
20 You sen yoa Good Spirit fo teach dem.
You neva hold back da manna bread
Dat come from you fo dem eat.
You give um watta wen dey thirsty.
21 Forty year, you wen make shua
Dey get eryting dey need fo live inside da boonies.
Az all dey wen need,
Cuz dea clotheses neva come boros,
An dea feets neva swell up.
22 ✡9:22: Census 21:21-35“You give dem lands
Dat had kings an peopos befo time.
You divide da land fo da Israel peopo,
Fo dem take ova da land from King Sihon, Heshbon side,
An from King Og, Bashan side.
23 ✡9:23 a: Start 15:5; 22:17; b: Josh 3:14-17You give dem plenny kids,
Jalike da plenny stars inside da sky.
You wen bring dem inside da land.
Az da same land
Dat you wen tell dea ancesta guys fo take ova.
24 ✡9:24: Josh 11:23So da ohanas dat come from yoa ancesta guys
Wen go ova dea, an take ova da land.
All da Canaan peopo dat stay live dea befo time,
You take away dea powa
An give dea king guys an dea peopo to yoa ohana guys,
Fo make da Israel peopo do how dey like to da Canaan peopo.
25 ✡9:25: Rules2 6:10-11Dey take ova towns dat get strong wall,
An da bestes kine lands.
Dey take ova plenny houses
Dat stay full wit all kine good stuff.
Dey take ova da holes da odda peopos wen dig
Fo keep watta inside,
An grape farms, an olive farms,
An trees wit fruits fo eat.
So oua peopo wen eat plenny an come full,
An even start fo come fat.
Dey party up cuz dey feel real good
Bout all da good tings you do fo dem.
26 ✡9:26: Local 2:11-16“But still yet, da peopo no like lissen.
Dey make war agains you.
Dey tell laytas to da Rules you wen teach
An make jalike dey no mean notting.
Dey kill da guys dat stay talk fo you,
Yoa talka guys dat wen talk to dem serious kine
Fo help um turn aroun
Fo come tight wit you one mo time.
Dey talk real bad bout you.
27 Cuz a dat, you wen make shua,
Da odda peopo dat stay agains oua Israel ohanas
Bus up oua peopo an make um suffa.
But wen oua peopo wen suffa,
Dey yell to you fo help dem.
You hear dem from inside da sky,
An cuz you get plenny pity fo dem,
You wen give some leada guys to oua peopo,
Fo get um outa da hard times dey stay in
Cuz a da ones dat stay agains dem.
28 “But wen oua peopo come inside dis land an make house dea,
One mo time dey go do bad kine stuff in front you.
You make shua dat da peopo dat stay agains dem
Bus dem up an come da boss guys fo oua peopo.
Den oua guys turn aroun like how was befo time
An yell fo help to you one mo time.
You hear dem from inside da sky,
An plenny times you get um outa trouble
Cuz you get plenny pity fo dem.
29 ✡9:29: Pries 18:5“You wen tell da peopo fo wise up,
Cuz you like make dem come back
An lissen yoa Rules.
But dey ack jalike you not fo real.
Dey no like lissen da tings
You teach dey gotta do,
An dey no lissen
Wat you tell cuz you da Judge.
Dey go do bad kine stuff,
Jalike you tell um no do.
Cuz wen peopo do wat you tell um,
Dey goin live fo real kine.
But dem, dey no like change.
Dey hard head an no like lissen.
30 ✡9:30: 2Kings 17:13-18; 2Rec 36:15-16Fo plenny year you hang in dea wit yoa peopo.
You wen sen yoa Spirit fo tell da guys dat talk fo God
Fo tell da peopo, ‘Wise up!’ but dey still yet no lissen.
So den, you let da peopo from odda lands
Take ova yoa peopo.
31 But cuz you get plenny pity fo yoa peopo,
You neva wipe um out,
An you neva leave dem an go way from dem.
Cuz you da God dat like do good tings fo yoa peopo,
An give peopo one mo chance.
32 ✡9:32: 2Kings 15:19, 29; 17:3-6; Ezra 4:2, 10“So now, we like tell dis to you
Cuz you da God dat stay big an strong
An we stay sked a you:
You stay do wat you promise fo do,
An you erytime stay tight wit yoa peopo.
An us guys know dat da way you see um,
All da bad kine stuff we do, az not manini,
But real serious fo oua king guys an alii guys,
Oua pries guys an da guys dat talk fo God,
Oua ancesta guys, an all yoa peopo.
We all stay tired cuz we suffa all dis,
From da time wen da Assyria king guys come agains us till today.
33 You wen do da right ting
Fo eryting dat happen to us guys.
Cuz we can trus you fo do
Wat you tell you goin do.
But us guys know fo shua
Dat we wen do bad kine stuff.
34 But oua king guys, da odda alii guys,
Da pries guys, an all oua ancesta guys,
Dey neva do wat yoa Rules tell um fo do.
Dey no lissen da tings you tell um fo do.
An dey no lissen wen you wen tell um
Fo watch out, no do um.
35 Dey even get one a dea guys fo come king fo dea land,
An you do plenny good tings fo dem,
An you put one big land in front dem, da bestes land.
But dey no do notting fo you,
An dey stay do bad kine stuff,
An dey still make any kine to odda peopo.
36 “An look at us guys!
Today, we ony slaves.
We live on top da land dat you give to oua ancesta guys
Fo dem eat da stuff dat grow dea
An da good tings da land get—
But still yet, us ony slaves!
37 All da rich kine stuff dat come from dis land,
Go to da king guys dat you put ova us guys,
Cuz we wen do bad kine stuff.
Dey stay in charge a us an oua animals
Fo do wateva dey like do.
Us guys presha out plenny
Cuz a all dese troubles!”
Da Guys Dat Sign Da Paypa Fo Do Da Right Tings
38 “Cuz a all dis, us guys like make one deal wit each odda fo all us can trus. We stay write um all down on top one paypa, an da alii guys an da Levi ohana guys an da pries guys, dey goin sign um. Den we roll um up an seal um wit da govmen seal.”
✡9:7 9:7 a: Start 11:31; 12:1; b: Start 17:5
✡9:8 9:8: Start 15:18-21
✡9:9 9:9 a: Outa 3:7; b: Outa 14:10-12
✡9:11 9:11 a: Outa 14:21-29; b: Outa 15:4-5
✡9:12 9:12: Outa 13:21-22
✡9:13 9:13: Outa 19:18–23:33; John 6:3
✡9:15 9:15 a: Outa 16:4-15; b: Outa 17:1-7; c: Rules2 1:21
✡9:16 9:16: Census 14:1-4; Rules2 1:26-33
✡9:17 9:17: Outa 34:6; Census 14:18
✡9:18 9:18: Outa 32:1-4
✡9:19 9:19: Rules2 8:2-4
✡9:22 9:22: Census 21:21-35
✡9:23 9:23 a: Start 15:5; 22:17; b: Josh 3:14-17
✡9:24 9:24: Josh 11:23
✡9:25 9:25: Rules2 6:10-11
✡9:26 9:26: Local 2:11-16
✡9:29 9:29: Pries 18:5
✡9:30 9:30: 2Kings 17:13-18; 2Rec 36:15-16
✡9:32 9:32: 2Kings 15:19, 29; 17:3-6; Ezra 4:2, 10