Muⱪeddes Kalam (yǝngi yeziⱪ) Pǝnd-nǝsiⱨǝtlǝr 30

Agurning pǝnd-nǝsiⱨǝtliri

1 Tɵwǝndikilǝr Yakǝⱨning oƣli Agurƣa wǝⱨiy bilǝn kǝlgǝn sɵzlǝrdur:

Bu adǝm Itiyǝlgǝ, yǝni Itiyǝl bilǝn Ukalƣa mundaⱪ sɵzlǝrni degǝn: — ◼

2 Mǝn dǝrwǝⱪǝ insanlar arisidiki ǝng nadini, ⱨaywanƣa ohxaxturmǝn;

Mǝndǝ insan ǝⱪli yoⱪ.

3 Danaliⱪni ⱨeq ɵgǝnmidim;

Biraⱪ Əng Pak-Muⱪǝddǝs Bolƣuqi ⱨǝⱪⱪidǝ sawatⱪa igǝ boldum. ◼

4 Kim ǝrxkǝ kɵtürülgǝn, yaki ǝrxtin qüxkǝn?

Kim xamalni ⱪollirida tutⱪan?

Kim sularni Ɵz toniƣa yɵgǝp ⱪoyƣan?

Kim yǝr-zeminning qegralirini bǝlgiligǝn?

Uning ismi nemǝ? Uning Oƣlining ismi nemǝ? Bilǝmsǝn-yoⱪ? ◘

5 Tǝngrining ⱨǝrbir sɵzi sinilip ispatlinip kǝlgǝndur;

U Ɵzigǝ tayanƣanlarning ⱨǝmmisini ⱪoƣdaydiƣan ⱪalⱪandur. ◘

6 Uning sɵzlirigǝ ⱨeq nǝrsǝ ⱪoxma;

Undaⱪ ⱪilsang, U seni ǝyiblǝydu,

Sening yalƣanqiliⱪing axkarilinidu. ◘

7 I Hudayim, Sǝndin ikki nǝrsini tilǝymǝn;

Mǝn ɵlgüqǝ bularni mǝndin ayimiƣaysǝn: —

8 Sahtiliⱪ wǝ yalƣanqiliⱪni mǝndin yiraⱪ ⱪilƣaysǝn;

Meni gadaymu ⱪilmay, baymu ⱪilmay, bǝlki eⱨtiyajimƣa layiⱪla riziⱪ bǝrgǝysǝn.

9 Qünki ziyadǝ toyup kǝtsǝm, Sǝndin yenip: «Pǝrwǝrdigar degǝn kim?» — dǝp ⱪelixim mumkin.

Yaki gaday bolup ⱪalsam, oƣriliⱪ ⱪilip, Sǝn Hudayimning namiƣa daƣ kǝltürüxim mumkin.

10 Hojayinining aldida uning ⱪuli üstidin xikayǝt ⱪilma,

Bolmisa u seni ⱪarƣap lǝnǝt ⱪilidu, ǝyibkar bolisǝn.

11 Ɵz atisini ⱪarƣaydiƣan,

Ɵz anisiƣa bǝht tilimǝydiƣan bir dǝwr bar,

12 Ɵzini pak qaƣlaydiƣan, ǝmǝliyǝttǝ mǝynǝtqilikidin ⱨeq yuyulmiƣan bir dǝwr bar,

13 Bir dǝwr bar — aⱨ, kibirlikidin nǝziri nemidegǝn üstün,

Ⱨakawurluⱪidin ⱨali nemidegǝn qong! ◼ ◘

14 Uning ajizlar wǝ yoⱪsullarni yalmap yutuwetidiƣan qixliri ⱪiliqtǝk,

Eziⱪ qixliri piqaⱪtǝk bolƣan bir dǝwr bar! ◘

15 Zülükning ikki ⱪizi bar, ular ⱨǝrdaim: «Bǝrgin, bǝrgin» dǝp towlixar.

Ⱨǝrgiz toyunmaydiƣan üq nǝrsǝ bar, ⱨǝrgiz ⱪanaǝtlǝnmǝydiƣan tɵt nǝrsǝ bar, ular bolsimu: — ◼

16 Gɵr, tuƣmas hotunning ⱪarni,

Suƣa toyunmiƣan ⱪurƣaⱪ Yǝr.

Wǝ ⱨǝrgiz «boldi, toydum» demǝydiƣan ottin ibarǝt. ◼

17 Atisini mǝshirǝ ⱪilidiƣan,

Anisini kǝmsitidiƣan kɵzni bolsa,

Ⱪaƣa-ⱪuzƣunlar qoⱪular,

Bürkütning balilirimu uni yǝr.

18 Mǝn üqün intayin tilsimat üq nǝrsǝ bar;

Xundaⱪ, mǝn qüxinǝlmǝydiƣan tɵt ix bar: —

19 Bürkütning asmandiki uqux yoli,

Yilanning taxta beƣirlap mangidiƣan yoli,

Kemining dengizdiki yoli wǝ yigitning ⱪizƣa axiⱪ boluxtiki yolidur.

20 Zinahor hotunning yolimu xundaⱪtur;

U bir nemini yǝp bolup aƣzini sürtüwǝtkǝn kixidǝk: «Mǝn ⱨeqⱪandaⱪ yamanliⱪni ⱪilmidim!» — dǝydu. ◼

21 Yǝr-zemin üq nǝrsǝ astida biaram bolar;

U kɵtürǝlmǝydiƣan tɵt ix bar: —

22 Padixaⱨ bolƣan ⱪul,

Tamaⱪⱪa toyƣan ⱨamaⱪǝt,

23 Nǝprǝtkǝ patⱪan, ǝrgǝ tǝgkǝn hotun,

Ɵz hanimining ornini basⱪan dedǝk. ◼

24 Yǝr yüzidǝ teni kiqik, lekin intayin ǝⱪilliⱪ tɵt hil janiwar bar: —

25 Qɵmülilǝr küqlük hǝlⱪ bolmisimu, biraⱪ yazda ozuⱪ tǝyyarliwelixni bilidu; ◘

26 Suƣurlar ɵzi ajiz bir ⱪowm bolsimu, hada taxlarning arisiƣa uwa salidu;

27 Qekǝtkilǝrning padixaⱨi bolmisimu, lekin ⱪatar tizilip rǝtlik mangidu;

28 Kǝslǝnqükni ⱪol bilǝn tutuwalƣili bolidu,

Lekin han ordilirida yaxaydu.

29 Ⱪǝdǝmliri ⱨǝywǝtlik üq janiwar bar,

Kixigǝ zoⱪ berip mangidiƣan tɵt nǝrsǝ bar: —

30 Ⱨaywanatlar iqidǝ ǝng küqlük, ⱨeq nemidin ⱪorⱪmas xir,

31 Zilwa bǝygǝ iti,

Tekǝ,

Wǝ puⱪraliri ⱪollaydiƣan padixaⱨdur. ◼ ◘

32 Əgǝr sǝn ǝhmǝⱪliⱪ ⱪilip ɵzüngni bǝk yuⱪiri orunƣa ⱪoyuwalƣan bolsang,

Wǝ yaki tǝlwǝ bir oyda bolƣan bolsang,

Ⱪolung bilǝn aƣzingni yum! ◼ ◘

33 Kala süti ⱪoqulsa seriⱪ may qiⱪar;

Birining burni mijilsa, ⱪan qiⱪar;

Adawǝt ⱪozƣap intiⱪam oylisa jedǝl-majira qiⱪar. ◼

◼30:1 «wǝⱨiy bilǝn kǝlgǝn sɵzlǝr» — ibraniy tilida «yüklǝngǝn sɵzlǝr» dǝp ipadilinidu. Demǝk, Pǝrwǝrdigarning Agurning dil-roⱨiƣa yükligǝn sɵzliri. «Bu adǝm» — Yakǝⱨning oƣli Agur. «Agur» degǝnning mǝnisi «topliƣuqi». Sulayman «Topliƣuqi» degǝn kitabta birnǝqqǝ ⱨekmǝt sɵzlǝrni topliƣanƣa ohxax, Agur bu babta birnǝqqǝ ⱨekmǝt sɵzlǝrni topliƣan.

◼30:3 «Biraⱪ Əng Pak-Muⱪǝddǝs Bolƣuqi ⱨǝⱪⱪidǝ sawatⱪa igǝ boldum — baxⱪa birhil tǝrjimisi: «Əng Pak-Muⱪǝddǝs Bolƣuqi ⱨǝⱪⱪidimu sawatim yoⱪtur». Biz bu tǝrjimini ⱪobul ⱪilmaymiz, qünki tɵwǝndiki ayǝtlǝrdǝ eniⱪki, yazƣuqi ⱨǝⱪiⱪǝtǝn Hudani tonuydu. Bizningqǝ uning tǝkitlimǝkqi bolƣini, igǝ bolƣan sawati yalƣuz Hudaning wǝⱨiysi bilǝnla kǝlgǝndur.

◘30:4 Ayup 38:4; Zǝb. 104:3; Yǝx. 40:12

◘30:5 Zǝb. 12:6-7; 18:30-31; 19:7-8; 119:140, 2Tim. 2:16

◘30:6 Ⱪan. 4:2; 12:32; Wǝⱨ. 22:18

◼30:13 «Ⱨakawurluⱪidin ⱨali nemidegǝn qong!» — ibraniy tilida «Ularning ⱪapaⱪliri nemanqǝ kɵtürülgǝn!».

◘30:13 Pǝnd. 6:17

◘30:14 Pǝnd. 12:18

◼30:15 «zülük» — su iqidǝ yaxaydiƣan ⱪanhor bir hil parazittur.

◼30:16 «Gɵr» — muxu yǝrdǝ «gɵr» ibraniy tilida «xeol», yǝni «tǝⱨtisara», ɵlüklǝrning roⱨliri ⱪiyamǝt künini kütidiƣan yǝrni kɵrsitidu.

◼30:20 «Mǝn ⱨeqⱪandaⱪ yamanliⱪni ⱪilmidim!» — zinahor hotunning yolining ajayibliⱪi bolsa ɵzining op’oquⱪ gunaⱨini ⱨeq tonumaydiƣanliⱪidin ibarǝt.

◼30:23 «Nǝprǝtkǝ patⱪan» — yaki «nǝprǝtlik», «nǝprǝtlǝngǝn».

◘30:25 Pǝnd. 6:8

◼30:31 «zilwa bǝygǝ iti» — yaki «bǝygǝ eti» — ibraniy tilida bu sɵz bǝk az uqraydu. «puⱪraliri ⱪollaydiƣan padixaⱨdur» — baxⱪa ikki hil tǝrjimisi: «Aƣdurulmas wǝ ɵrülmǝs padixaⱨdur» yaki «Ɵz ⱪoxunini baxliƣan padixaⱨdur».

◘30:31 Ayup 39:19-28

◼30:32 «Ⱪolung bilǝn aƣzingni yum!» — bǝlkim ibraniy tilida «boldi, bǝs!» degǝn mǝnini berix mumkin.

◘30:32 Ayup 21:5

◼30:33 «Kala süti ⱪoqulsa ... birining burni mijilsa.... adawǝt ⱪozƣap intiⱪam oylisa ...» — bu jümlidiki «ⱪoqulsa» «mijilsa» wǝ «ⱪozƣap ... oylisa» ibraniy tilida ohxax bir peil bilǝn ipadilǝngǝn.