Muⱪeddes Kalam (yǝngi yeziⱪ) Korintliⱪlarƣa «2» 4

Pawlusning jamaǝtlǝrning hizmitidǝ bolƣan qidamliⱪ, sǝwr-taⱪǝtliki — Hizmǝttǝ qidamliⱪ

1 Xunga Huda bizgǝ rǝⱨim-xǝpⱪǝt kɵrsǝtkǝndǝk, bu hizmǝt bizgǝ amanǝt ⱪilinƣanikǝn, biz bǝl ⱪoywǝtmǝymiz; 2 ǝmdiliktǝ xǝrmǝndilikkǝ ait yoxurun ixlarni taxlap, nǝ aldamqiliⱪta mangmay, nǝ Hudaning sɵzini burmilimay, bǝlki ⱨǝⱪiⱪǝtni ǝynǝn ayan ⱪilix bilǝn Huda aldida durusluⱪimizni ⱨǝr adǝmning wijdaniƣa kɵrsitimiz.■ 3 Əmma hux hǝwirimiz qümkǝlgǝn bolsimu, u ⱨalak boluwatⱪanlarƣa nisbǝtǝn qümkǝldi;■ 4 Qünki Hudaning sürǝt-obrazi bolƣan Mǝsiⱨning xan-xǝripi toƣrisidiki hux hǝwǝrning nuri ularning üstidǝ yorumisun dǝp, bu zamanning ilaⱨi etiⱪadsizlarning oy-zeⱨinlirini kor ⱪildi.□ ■ 5 Qünki biz ɵzimizni ǝmǝs, bǝlki Mǝsiⱨ Əysani Rǝb, xuningdǝk ɵzimizni Əysa üqün silǝrning hizmǝtkaringlar dǝp elan ⱪilimiz.□ 6 Qünki «ⱪarangƣuluⱪtin nur yorusun» dǝp buyruƣan Huda, Mǝsiⱨning didaridin Ɵzining xan-xǝripini tonutuxⱪa bolƣan yoruⱪluⱪning biz arⱪiliⱪ qeqilixi üqün, bizning ⱪǝlbimizni yorutⱪandur.■

Mǝnggülük xan-xǝrǝpning zor wǝzni

7 Əmma ⱪudrǝtning ƣayǝt zorluⱪi bizdin ǝmǝs, bǝlki Hudadin bolƣanliⱪi kɵrünsun dǝp bu gɵⱨǝrgǝ sapal idixlarda ⱪaqilaⱪliⱪ ⱨalda igidarliⱪ ⱪilimiz.□ ■ 8 Mana biz ⱨǝrtǝrǝptǝ ⱪistilip ⱪalduⱪ, ǝmma yǝnjilmiduⱪ; tǝmtirǝp ⱪalduⱪ, ǝmma ümidsizlǝnmiduⱪ; 9 ziyankǝxlikkǝ uqrawatimiz, ǝmma ⱨǝmdǝmsiz ⱪalmiduⱪ; yiⱪitilduⱪ, ǝmma ⱨalak bolmiduⱪ; 10 Əysaning ⱨayati tenimizdǝ ayan ⱪilinsun dǝp, ⱨǝrdaim tenimizdǝ Əysaning ɵlümini kɵtürüp yürimiz. □ ■ 11 Qünki Əysaning ⱨayati ɵlidiƣan ǝtlirimizdǝ ayan ⱪilinsun üqün, tirik ⱪalƣan bizlǝr ⱨǝrdaim ɵlümgǝ tapxurulmaⱪtimiz. □ ■ 12 Xuning bilǝn bizdǝ ɵlüm ixlǝwatidu, ǝmma ⱨayat silǝrdǝ ixlǝwatidu. □ 13 Wǝ «Mǝn ixǝndim, xunga sɵz ⱪildim» dǝp yezilƣandikidǝk iman-ixǝnqtiki roⱨⱪa igǝ bolup, bizmu ixǝnduⱪ wǝ xuning bilǝn sɵz ⱪilimiz; □ ■ 14 qünki Rǝb Əysani tirildürgǝn Huda bizni Əysa bilǝn birgǝ tirildüridu, xundaⱪla bizni silǝr bilǝn birgǝ Ɵz aldiƣa ⱨazir ⱪilidu, dǝp bilimiz. ■ 15 Qünki bu ⱨǝmmǝ ixlar silǝr üqündurki, tehimu kɵp kixilǝrning wujudida exip taxⱪuqǝ beƣixlanƣan meⱨir-xǝpⱪǝt sǝwǝbidin kɵp kixilǝrningmu Hudani uluƣlap eytⱪan tǝxǝkkürliri exip taxidu. ■ 16 Xunga biz bǝl ⱪoyuwǝtmǝymiz; gǝrqǝ taxⱪi insanliⱪimiz solaxsimu, dǝrⱨǝⱪiⱪǝt iqki insanliⱪimiz kündin-küngǝ yengilanmaⱪta. □ 17 Qünki bizning bir dǝⱪiⱪilik wǝ yenik japa-muxǝⱪⱪǝtlirimiz biz üqün exip taxⱪan, mǝnggülük, zor wǝzinlik xan-xǝrǝpni ⱨasil ⱪilidu. ■ 18 Xunga biz kɵrüngǝn ixlarƣa ǝmǝs, bǝlki kɵrünmǝs ixlarƣa kɵz tikimiz; qünki kɵrüngǝn ixlar waⱪitliⱪ, ǝmma kɵrünmǝs ixlar mǝnggülüktur.

■4:2 2Kor. 2:17; 2Kor. 6:4

■4:3 2Kor. 2:15; 2Tes. 2:10.

□4:4 «bu zamanning ilaⱨi etiⱪadsizlarning oy-zeⱨinlirini kor ⱪildi» — «bu zamanning ilaⱨi» Xǝytan, Iblis.

■4:4 Yǝx. 6:10; Yⱨ. 12:40; 14:9. Fil. 2:6. Kol. 1:15. Ibr. 1:3.

□4:5 «biz ɵzimizni ǝmǝs, bǝlki Mǝsiⱨ Əysani Rǝb, xuningdǝk ɵzimizni Əysa üqün silǝrning hizmǝtkaringlar dǝp elan ⱪilimiz» — «hizmǝtkarlar» muxu yǝrdǝ grek tilida «ⱪullar» deyilidu. Demǝk, ɵzini (ⱨǝrhil sǝwǝblǝr bilǝn) baxⱪa birsining hizmitidǝ boluxⱪa satⱪan kixilǝr.

■4:6 Yar. 1:3; 2Pet. 1:19.

□4:7 «...bu gɵⱨǝrgǝ sapal idixlarda ⱪaqilaⱪliⱪ ⱨalda igidarliⱪ ⱪilimiz» — «sapal idixlar» bolsa etiⱪadqilarning ɵz ajiz wujud-tǝnliri, ǝlwǝttǝ.

■4:7 1Kor. 2:5; 2Kor. 5:1.

□4:10 «Əysaning ⱨayati tenimizdǝ ayan ⱪilinsun dǝp, ⱨǝrdaim tenimizdǝ Əysaning ɵlümini kɵtürüp yürimiz» — «Əysaning ɵlümini kɵtürüx» degǝnlik bǝlkim rosullar daim azap-oⱪubǝtni tartⱪanliⱪi, daim ɵltürülüxning hǝwpidǝ turuwatⱪanliⱪini kɵrsitidu. Əmma bu bayanni yǝnǝ ⱨǝmmǝ etiⱪadqi üqün muⱨim roⱨiy prinsip degili bolidu. 11-ayǝtni kɵrüng.

■4:10 Rim. 8:17; Gal. 6:17; Fil. 3:10; 2Tim. 2:11,12; 1Pet. 4:13.

□4:11 «qünki Əysaning ⱨayati ɵlidiƣan ǝtlirimizdǝ ayan ⱪilinsun üqün, tirik ⱪalƣan bizlǝr ⱨǝrdaim ɵlümgǝ tapxurulmaⱪtimiz» — «ɵlümgǝ tapxurulmaⱪtimiz» — Huda tǝripidin, ǝlwǝttǝ.

■4:11 Zǝb. 44:22; Mat. 5:11; Rim. 8:36; 1Kor. 4:9; 15:49; Kol. 3:4.

□4:12 «Xuning bilǝn bizdǝ ɵlüm ixlǝwatidu, ǝmma ⱨayat silǝrdǝ ixlǝwatidu» — muxu muⱨim prinsip toƣruluⱪ «ⱪoxumqǝ sɵz»imizni kɵrüng.

□4:13 «Mǝn ixǝndim, xunga sɵz ⱪildim» — «Zǝb.» 116:10. «iman-ixǝnqtiki roⱨⱪa igǝ bolup, bizmu ixǝnduⱪ wǝ xuning bilǝn sɵz ⱪilimiz» — «sɵz ⱪilimiz» — demǝk, hux hǝwǝrni jakarlaymiz.

■4:13 Zǝb. 116:10

■4:14 Rim. 8:11; 1Kor. 6:14.

■4:15 2Kor. 1:11.

□4:16 «gǝrqǝ taxⱪi insanliⱪimiz solaxsimu, dǝrⱨǝⱪiⱪǝt iqki insanliⱪimiz kündin-küngǝ yengilanmaⱪta» — «taxⱪi insanliⱪimiz» adǝmning jan-tenini, «iqki insanliⱪimiz» adǝmning ⱪǝlb-roⱨini, iqki dunyasini kɵrsitidu. Grek tilida «taxⱪi insanimiz» wǝ «iqki insanimiz» deyilidu.

■4:17 Zǝb. 30:5; Mat. 5:12; Rim. 8:18; 1Yuⱨa. 3:2.