Muⱪeddes Kalam (yǝngi yeziⱪ) Ayup 12

Ayup yǝnǝ sɵz ⱪilidu •••• «Hudaning küq-ⱪudriti, Uning adilliⱪi wǝ kɵrünüxtǝ bolƣan adilsizliⱪi»

1 Ayup jawabǝn mundaⱪ dedi: —

2 Silǝr bǝrⱨǝⱪ ǝl-ǝⱨlisilǝr!

Ɵlsǝnglar ⱨekmǝtmu silǝr bilǝn billǝ ketidu!

3 Meningmu silǝrdǝk ɵz ǝⱪlim bar,

Əⱪildǝ silǝrdin ⱪalmaymǝn;

Bunqilik ixlarni kim bilmǝydu?!

4 Mǝn ɵz dostlirimƣa mazaⱪ obyekti boldum;

Mǝndǝk Tǝngrigǝ iltija ⱪilip, duasi ijabǝt bolƣan kixi,

Ⱨǝⱪⱪaniy, durus bir adǝm mazaⱪ ⱪilindi!■

5 Raⱨǝttǝ olturƣan kixilǝr kɵnglidǝ ⱨǝrⱪandaⱪ külpǝtni nǝzirigǝ almaydu;

Ular: «Külpǝtlǝr putliri teyilix aldida turƣan kixigila tǝyyar turidu» dǝp oylaydu.□

6 Ⱪaraⱪqilarning qedirliri awatlixidu;

Tǝngrigǝ ⱨaⱪarǝt kǝltüridiƣanlar aman turidu;

Ular ɵzining ilaⱨini ɵz alⱪinida kɵtüridu.□ ■

7 Əmdi ⱨaywanlardinmu sorap baⱪ,

Ular sanga ɵgitidu,

Asmandiki uqar-ⱪanatlarmu sanga dǝydu;

8 Wǝ yaki yǝr-zeminƣa gǝp ⱪilsangqu,

Umu sanga ɵgitidu;

Dengizdiki beliⱪlar sanga sɵz ⱪilidu.

9 Bularning ⱨǝmmisini Pǝrwǝrdigarning ⱪoli ⱪilƣanliⱪini kim bilmǝydu?

10 Barliⱪ jan igiliri, barliⱪ ǝt igiliri,

Jümlidin barliⱪ insanning nǝpisi uning ⱪolididur.

11 Eƣizda taamni tetiƣandǝk,

Ⱪulaⱪmu sɵzining toƣriliⱪini sinap baⱪidu ǝmǝsmu?■

12 Yaxanƣanlarda danaliⱪ rast tepilamdu?

Künlirining kɵp boluxi bilǝn yorutulux kelǝmdu?

13 Uningdila danaliⱪ ⱨǝm ⱪudrǝt bar;

Uningdila yolyoruⱪ ⱨǝm yorutux bardur.□

14 Mana, U harab ⱪilsa, ⱨeqkim ⱪaytidin ⱪurup qiⱪalmaydu;

U ⱪamap ⱪoyƣan adǝmni ⱨeqkim ⱪoyuwetǝlmǝydu.■

15 Mana, U sularni tohtitiwalsa, sular ⱪurup ketidu,

U ularni ⱪoyup bǝrsǝ, ular yǝr-zeminni besip wǝyran ⱪilidu.

16 Uningda küq-ⱪudrǝt, qin ⱨekmǝtmu bar;

Aldiƣuqi, aldanƣuqimu uningƣa tǝwǝdur.

17 U mǝsliⱨǝtqilǝrni yalingaq ⱪildurup, yalap elip ketidu,

Soraⱪqilarni rǝswa ⱪilidu.■

18 U padixaⱨlar ǝl-ǝⱨligǝ salƣan kixǝnlǝrni yexidu,

Andin xu padixaⱨlarni yalingaqlap, qatraⱪlirini lata bilǝnla ⱪaldurup xǝrmǝndǝ ⱪilidu.□

19 U kaⱨinlarni yalingayaƣ mangdurup elip ketidu;

U küq-ⱨoⱪuⱪdarlarni aƣduridu.□

20 U ixǝnqlik ⱪaralƣan zatlarning aƣzini etidu;

Aⱪsaⱪallarning ǝⱪlini elip ketidu.■

21 U aⱪsɵngǝklǝrning üstigǝ ⱨaⱪarǝt tɵkidu,

U palwanlarning bǝlweƣini yexip ularni küqsiz ⱪilidu.□ ■

22 U ⱪarangƣuluⱪtiki qongⱪur sirlarni axkarilaydu;

U ɵlümning sayisini yorutidu.■

23 U ǝl-yurtlarni uluƣlaxturidu ⱨǝm andin ularni gumran ⱪilidu;

Əl-yurtlarni kengǝytidu, ularni tarⱪitidu.■

24 U zemindiki ǝl-jamaǝtning kattiwaxlirining ǝⱪlini elip ketidu;

Ularni yolsiz dǝxt-bayawanda sǝrsan ⱪilip azduridu.■

25 Ular nursizlandurulup ⱪarangƣuluⱪta yolni silaxturidu,

U ularni mǝst bolup ⱪalƣan kixidǝk galdi-guldung mangduridu.

Ayup
<
12
>

■12:4 Ayup 16:10; 17:2; 21:3; 30:1; Pǝnd. 14:2

□12:5 «Raⱨǝttǝ olturƣan kixilǝr... : «külpǝtlǝr putliri teyilix aldida turƣan kixigila tǝyyar turidu» dǝp oylaydu» — ǝsli tekistni qüxinix sǝl tǝs. Baxⱪa hil tǝrjimilirimu uqrixi mumkin.

□12:6 «Ular ɵzining ilaⱨini ɵz alⱪinida kɵtüridu» — demǝk, ular butpǝrǝslar. Baxⱪa bir hil tǝrjimisi: «Tǝngri ⱨǝtta ularning ⱪoliƣa molqiliⱪ beridu».

■12:6 Ayup 21:7; Zǝb. 73:11, 12; Yǝr. 12:1; Ⱨab. 1:3, 4

■12:11 Ayup 6:30; 34:3

□12:13 «Uningdila» — Hudadila, demǝkqi.

■12:14 Ayup 9:12; 11:10; Wǝⱨ. 3:7

■12:17 2Sam. 15:31; 17:14,23; Yǝx. 19:12; 29:14; 1Kor. 1:19

□12:18 «U padixaⱨlar ǝl-ǝⱨligǝ salƣan kixǝnlǝrni yexidu, andin xu padixaⱨlarni yalingaqlap, ... xǝrmǝndǝ ⱪilidu» — muxu padixaⱨlar mustǝbit boluxi natayin; ular puⱪrilarƣa salƣan kixǝnlǝrni bǝlkim adilliⱪ bilǝn salƣan boluxi mumkin. Baxⱪa birnǝqqǝ hil tǝrjimilirimu uqrixi mumkin.

□12:19 «kaⱨinlar» — hǝlⱪⱪǝ wakalitǝn ⱪurbanliⱪ ⱪilƣuqilar, ular üqün dua ⱪilƣuqilar.

■12:20 Ayup 32:9; Yǝx. 3:2, 3

□12:21 «U aⱪsɵngǝklǝrning üstigǝ ⱨaⱪarǝt tɵkidu, U palwanlarning bǝlweƣini yexip ularni küqsiz ⱪilidu» — muxu aⱪsɵngǝk, palwanlar ǝslidǝ mǝlum bir gunaⱨ yaki zalimliⱪni ⱪilƣanliⱪi natayin. Ayup bu yǝrdǝ: Huda taxⱪi kɵrünüxtǝ sǝwǝbsiz ⱨalda bu esilzadǝ kixilǝrgǝ ⱨǝrhil külpǝt qüxüridu ⱨǝm xuning bilǝn bir waⱪitta, baxⱪa nurƣun kixilǝrni ⱪiyinqiliⱪⱪa duqar ⱪilidu, demǝkqi bolƣan boluxi mumkin. Qünki «aⱪsaⱪallarning ǝⱪli elip ketilgǝn» deyix arⱪiliⱪ ularning mǝsliⱨǝt beridiƣan adǝmliriningmu ǝⱨwalining hǝtǝrlik ikǝnlikidin bexarǝt beridu. Bu palakǝtlǝr mǝlum bir gunaⱨdin qiⱪⱪan boluximu yaki undaⱪ bolmasliⱪimu mumkin. Ayupning yuⱪiriⱪi sɵzlirigǝ ⱪariƣanda 23-25-ayǝtlǝrdǝ deyilgǝn awatqiliⱪ ⱨǝm külpǝtlǝr ohxaxla yüz bǝrgǝndǝk kɵrinidu.

■12:21 Zǝb. 107:40

■12:22 Mat. 10:26; 1Kor. 4:5

■12:23 Zǝb. 107:38

■12:24 Zǝb. 107:4-5, 40