Муқеддес Калам (кирил йезиқ) Пәнд-несиһәтләр 17

1 Қурбанлиқ гөшлиригә толған җедәллик өйдин,

Бир чишләм қуруқ нан йәп, көңүл течлиқта болған әвзәл.□ ■

2 Хизмәткар чевәр болса, ғоҗисиниң номуста қойғучи оғлини башқурар;

Кәлгүсидә у ғоҗиниң оғли қатарида туруп униң мирасни тәқсим қилар.

3 Сапал қазан күмүчни тавлар, чанақ алтунни тавлар,

Бирақ адәмниң қәлбини Пәрвәрдигар синар.■

4 Қәбиһ киши яман сөзләргә ишинәр;

Ялғанчи питничиләрниң сөзигә қулақ салар.

5 Мискинләрни мәсқирә қилғучи, өзини Яратқучини һақарәтлигүчидур;

Башқиларниң бәхитсизлигидин хошал болған киши җазасиз қалмас.■

6 Қериларниң нәврилири уларниң таҗидур;

Пәрзәнтләрниң пәхри уларниң атилиридур.

7 Ахмақ яришиқ гәп қилса униңға ярашмас;

Мөтивәр ялған сөзлисә униңға техиму ярашмас.

8 Пара — уни бәргүчиниң нәзиридә есил бир гөһәрдур;

Гоя уни нәгила ишләтсә мувәппәқийәткә еришидиғандәк.□

9 Башқиларниң хаталиқини йопутуп кәчүргән киши меһир-муһәббәтни көзләр;

Кона хаманни сориған киши йеқин достларни дүшмән қилар.

10 Ақиланигә сиңгән бир еғиз тәнбиһ,

Ахмаққа урулған йүз дәрридин үнүмлүктур.

11 Яманлар пәқәт асийлиқни көзләр;

Уни җазалашқа рәһимсиз бир әлчи әвәтиләр.

12 Әхмиқанә иш қиливатқан надан кишигә учрап қалғандин көрә,

Балилиридин айрилған ейиққа йолуғуп қалған яхши.

13 Кимки яхшилиққа яманлиқ қилса,

Ишигидин балайиқаза нери кәтмәс.■

14 Җедәлниң башлиниши тосмини су елип кәткәнгә охшайду;

Шуңа җедәл партлаштин авал талаш-тартиштин қол үзгин.■

15 Яманни ақлиған,

Һәққанийға қара чаплиған,

Охшашла Пәрвәрдигарға жиркиничликтур.■

16 Ахмақниң көңли даналиқни әтиварлимиса,

Қандақму униң қолида даналиқни сетивалғидәк пули болсун?□

17 Һәқиқий дост һәрдайим саңа муһәббәт көрситәр,

Һәқиқий қериндаш яман күнүң үчүн ярдәмгә дунияға кәлгәндур.

18 Әқилсиз киши қол берип,

Йеқини үчүн кепил болиду.

19 Җедәлгә амрақ гунаға амрақтур;

Босуғини егиз қилған һалакәтни издәр.□ ■

20 Нийити бузулған яхшилиқ көрмәс;

Тилида һәқ-наһәқни астин-үстүн қилғучи балаға йолуқар.

21 Бала ахмақ болса, ата ғәм-қайғуға патар;

Һамақәтниң атиси хушаллиқ көрмәс.

22 Шат көңүл шипалиқ доридәк тәнгә давадур;

Сунуқ роһ-дил адәмниң илигини қурутар.■

23 Чирик адәм йәң ичидә парини қобул қилар;

У адаләтниң йолини бурмилар.□

24 Даналиқ йорутулған кишиниң көз алдида турар;

Бирақ әқилсизниң көзи хиялкәшлик қилип қутупта жүрәр.■

25 Галваң бала атини азапға салар;

Уни туққучиниңму дәрди болар.■

26 Һәққанийларға җәриманә қоюшқа қәтъий болмас;

Әмирләрни адаләтни қоллиғини үчүн думбалашқа болмас.□

27 Билими бар киши кам сөзлүк болар;

Йорутулған адәм қалтис еғир-бесиқ болар.□

28 Һәтта ахмақму аз сөзлисә дана һесаплинар;

Тилини тизгинлигән киши данишмән санилар.

□17:1 «Қурбанлиқ гөшлири» — ибранийлар ибадәтханида Худаға атап сойған бәзи қурбанлиқ гөшлириниң көп қисмини өйигә әкилип йейишкә болатти.

■17:1 Пәнд. 15:17

■17:3 Пәнд. 27:21; Йәр. 17:10

■17:5 Пәнд. 14:31

□17:8 «Пара — ...гоя уни нәгила ишләтсә мувәппәқийәткә еришидиғандәк» — бу айәт һәҗвий, кинайилик сөз болуп, умумий амма әпсуслинарлиқ бир әһвални көрситиду; әлвәттә, у бу ишни тәриплимәйду. Башқа бир хил тәрҗимиси: «У буни нәгила ишләтсәм мувәппәқийәткә еришимән, дәйду».

■17:13 Қан. 32:35; Пәнд. 20:22; 24:29; Рим. 12:17; 1Тес. 5:15; 1Пет. 3:9

■17:14 Пәнд. 20:3

■17:15 Мис. 23:7; Пәнд. 24:24; Йәш. 5:23

□17:16 «Ахмақниң көңли даналиқни әтиварлимиса,...» — ибраний тилида «Әқмәқниң һеч көңли йоқ турса,...»

□17:19 «Босуғини егиз қилған (киши)» — ибраний тилида «Дәрвазисини егиз қилған (киши)». Бундақ адәм бәлким өзиниң бай екәнлигини көз-көз қилмақчи болиду.

■17:19 Пәнд. 16:18

■17:22 Пәнд. 15:13

□17:23 «Чирик адәм йәң ичидә парини қобул қилар» — ибраний тилида «Чирик адәм бағрида парини қобул қилар...» яки «Чирик адәм бағирдин парини алар...».

■17:24 Топ. 2:14; 8:1

■17:25 Пәнд. 10:1; 15:20; 19:13

□17:26 «җәриманә қоюш» — «җәриманә қоюш»ниң «җазалаш» дегән умумий мәнасиму болуши мүмкин. «Һәққанийларға җәриманә қоюшқа қәтъий болмас» — ибраний тилида «Һәққанийларға җәриманә қоюшқа яхши әмәс».

□17:27 «қалтис еғир-бесиқ болар» — ибраний тилида «салқин роһи бар» дегәнни билдүриду.