Муқеддес Калам (кирил йезиқ) Аюп 5

Елифазниң сөзини давамлаштуруши

1 Қени, илтиҗа қилип бақ, саңа җавап қилғучи бармекин?

Муқәддәсләрниң қайсисидин панаһ тиләйсән?□

2 Чүнки ахмақниң аччиғи өзини өлтүриду,

Қәһри наданниң җениға замин болиду.□

3 Мән өз көзүм билән ахмақниң йилтиз тартқанлиғини көргәнмән;

Лекин шу һаман униң маканини «Ләнәткә учрайду!» дәп билдим,□

4 Униң балилири аманлиқтин жирақтур;

Улар шәһәр дәрвазисида сот қилинғанда бастурулди;

Уларға һеч ким һимайичи болмайду.

5 Униң һосулини ачлар йәп түгитиду;

Улар һәтта тикән арисида қалғанлириниму елип түгитиду;

Қилтақчиму униң мал-мүлүклирини жутувелишқа тәйяр туриду.

6 Чүнки аваричилик әзәлдин топидин үнүп чиқмайду,

Күлпәтму йәрдин өсүп чиққанму әмәс.

7 Бирақ учқун жуқуриға учидиғандәк,

Инсан күлпәт тартишқа туғулғандур.□

8 Орнуңда мән болсам, Тәңриғила мураҗиәт қилаттим,

Мән ишимни Худайимғила тапшуриветәттим.

9 У һесапсиз карамәтләрни,

Сан-санақсиз мөҗизиләрни яритиду.■

10 У йәргә ямғур тәқдим қилиду;

У дала үстигә су әвәтип бериду.■

11 У пәс орунда туридиғанларниң мәртивисини үстүн қилиду;

Матәм тутқанлар аманлиққа көтирилиду.■

12 У һейлигәрләрниң нийәтлирини бекар қиливетиду,

Нәтиҗидә улар ишини пүттүрәлмәйду.□ ■

13 У мәккарларни өз һейлигәрлигидин қапқанқа алиду;

Әгирләрниң нәйрәңлири еқитип кетилиду.□ ■

14 Күндүздә улар қараңғулуққа учрайду;

Чүштә түн кечидәк силаштуруп маңиду.■

15 Бирақ у мискинләрни мәккарларниң қиличи вә ағзидин қутқузиду,

Уларни күчлүкләрниң чаңгилидин қудрәтлик қоли билән қутқузиду.

16 Шуңа, аҗизлар үчүн үмүт туғулиду,

Қәбиһлик ағзини юмиду.■

17 Қара, Тәңри ибрәт бәргән адәм бәхитликтур,

Шуңа, Һәммигә Қадирниң тәрбийисигә сәл қарима җуму!■

18 Чүнки У адәмни яриландуриду, андин ярини таңиду;

У санҗийду, бирақ Униң қоллири йәнә сақайтиду.■

19 У сени алтә қийинчилиқтин қутқузиду;

Һәтта йәттә күлпәттә һеч қандақ яманлиқ саңа тәгмәйду.□ ■

20 Ачарчилиқта У сениң үлүмиңгә,

Урушта У саңа урулған қилич зәрбисигә ниҗаткар болиду.

21 Сән зәһәрлик тилларниң зәрбисидиму башпанаһлиқ ичигә йошурунисән,

Вәйранчилиқ кәлгәндә униңдин һеч қорқмайдиған болисән.

22 Вәйранчилиқ вә қәһәтчилик алдида күлүпла қойисән;

Йәр йүзидики һайванлардинму һеч қорқмайсән.

23 Сән даладики ташлар билән әһдидаш болисән;

Явайи һайванларму сән билән енақ өтиду.■

24 Сән чедириңниң теч-аманлиқта болидиғанлиғини билип йетисән;

Мал-мүлкүңни едитлисәң, һәммә немәңниң тәл екәнлигини байқайсән.

25 Нәслиң көп болидиғанлиғини,

Пәрзәнтлириңниң от-чөптәк көп екәнлигини билисән.□

26 Сән өз вақтидила йетилип жиғилған бир бағ буғдайдәк,

Пәқәт вақит-саитиң пишип йетилгәндила йәрлигиңгә кирисән.

27 Биз өзимиз буни тәкшүрүп көргәнмиз — улар һәқиқәтән шундақтур.

Шуңа өзүң аңлап бил, буларни өзүңгә тәтбиқлап ойлап бақ».

Аюп
<
5
>

□5:1 «Муқәддәсләр» — мошу йәрдә бәлким муқәддәс пәриштиләрни көрситиду.

□5:2 «Қәһри наданниң җениға замин болиду» — яки «Көрмәслиги наданниң җениға замин болиду». Елифазниң бу сөзиниң мәнаси: Аюпниң аччиқлинип, Худаға қақшиши хәтәрлик иш; Худа униңға җавап кәлмигән йәрдә, Худа вә инсанниң арилиғида туридиған бир «келиштүргүчи»динму ярдәм тиләш пүтүнләй беһудә иш, дегәнлик болуши мүмкин.

□5:3 «Лекин шу һаман униң маканини «ләнәткә учрайду!» дәп билдим» — башқа бир хил тәрҗимиси: «Лекин мән дәрһал униң маканиға ләнәт оқудум».

□5:7 «Инсан күлпәт тартишқа туғулғандур» — яки «Инсан җапа тартишқиму туғулғандур». Кириш сөзимиздә ейтқинимиздәк, оқурмәнләрниң есидә болсунки, Аюпниң үч достиниң бәргән пикирлиридә хелә көп хаталиқ йәрлири бар. Кейин Худа шу хата гәплири үчүн уларни әйипләйду. 42:7-9ни көрүң.

■5:9 Аюп 9:10; Зәб. 71:18; Рим. 11:33

■5:10 Зәб. 103:10

■5:11 1Сам. 2:7; Зәб. 112:7, 8

□5:12 «У һейлигәрләрниң нийәтлирини бекар қиливетиду, нәтиҗидә улар ишини пүттүрәлмәйду» — бу айәт Инҗилда («1Кор.» 1:19) расул Павлус тәрипидин нәқил кәлтүрүлгән, шуңа шүбһисизки уни тоғра дәп билимиз.

■5:12 Нәһ. 4:9; Зәб. 32:10; Йәш. 8:10

□5:13 «У мәккарларни өз һейлигәрлигидин қапқанқа алиду» — Елифазниң бу җүмлисиму Инҗилда («1Кор.» 3:19) расул Павлус тәрипидин нәқил кәлтүрүлгән, шуңа шүбһисизки униму тоғра дәп билимиз.

■5:13 1Кор. 3:19

■5:14 Қан. 28:29

■5:16 Зәб. 106:42

■5:17 Пәнд. 3:11, 12; Ибр. 12:5; Яқ. 1:12; Вәһ. 3:19

■5:18 Қан. 32:39; 1Сам. 2:6; Һош. 6:1

□5:19 «... алтә қийинчилиқ... йәттә күлпәттә ... » — бу «алтә... йәттә...» дегән ибарә «һәр хил..., һәр қандақ...» дегәнни билдүриду.

■5:19 Зәб. 90

■5:23 Һош. 2:20

□5:25 «Нәслиң көп болидиғанлиғини, пәрзәнтлириңниң от-чөптәк көп екәнлигини билисән» — Елифаз Аюпниң он балисидин һәм барлиқ мал-мүлкидин айрилип қалғанлиғини пүтүнләй есидин чиқирип қойғандәк қилатти.