106
106-küy •••• Hudaning wapadarliⱪi wǝ sǝwr-taⱪiti; insanning wapasizliⱪi
1 Ⱨǝmdusana!
Pǝrwǝrdigarƣa tǝxǝkkür eytinglar!
Qünki U meⱨribandur, ǝbǝdiydur Uning meⱨir-muⱨǝbbiti. ◼«Pǝrwǝrdigar... meⱨribandur, ǝbǝdiydur Uning meⱨir-muⱨǝbbiti...» — bu küydǝ Tǝwrattiki «Mis.» 1-24-bablar, «Qɵl.» 11-17, 20-bablar, «Yǝxua», «Batur ⱨakimlar» ⱨǝm «Padixaⱨlar» degǝn ⱪisimlardiki tarih kɵzdǝ tutulidu. ◘1Tar. 16:34-36; Zǝb. 107:1; 118:1; 136:1
2 Pǝrwǝrdigarning ⱪudrǝtlik ⱪilƣanlirini kim sɵzlǝp berǝlǝydu?
Uning bar xan-xɵⱨritini kim jakarlap berǝlǝydu?
3 Bǝhtliktur adalǝtni tutⱪan,
Daim ⱨǝⱪⱪaniyliⱪni yürgüzgǝn kixi!
4 Hǝlⱪinggǝ bolƣan ⱨimmiting bilǝn meni ǝsligǝysǝn, i Pǝrwǝrdigar;
Nijatliⱪing bilǝn yenimƣa kelip hǝwǝr alƣin! ◼«Nijatliⱪing bilǝn yenimƣa kelip hǝwǝr alƣin!» — ibraniy tilida: «Nijatliⱪing bilǝn meni yoⱪliƣaysǝn» degǝn sɵzlǝr bilǝn ipadilinidu.
5 Xuning bilǝn, Sǝn talliƣanliringning bǝrikitini kɵrǝy,
Ɵz elingning xadliⱪi bilǝn xad bolay,
Ɵz mirasing bolƣan hǝlⱪing bilǝn pǝhirlinip, yayrap yürǝy!
6 Biz ata-bowilirimiz ⱪatarida gunaⱨ ɵtküzduⱪ,
Ⱪǝbiⱨlik ⱪilduⱪ, yamanliⱪ ǝyliduⱪ. ◘Law. 26:40; Yǝr. 3:25; Dan. 9:5
7 Misirda turƣan ata-bowilirimiz mɵjiziliringni nǝzirigǝ almay,
Kɵp meⱨribanliⱪliringni esigǝ almidi;
Bǝlki dengizda, Ⱪizil Dengiz boyida isyan kɵtürdi. ◘Mis. 14:11,12
8 Biraⱪ U ⱪudritimni namayan ⱪilay dǝp,
Ɵz nami üqün ularni ⱪutⱪuzdi. ◘Mis. 9:16
9 Uning Ⱪizil Dengizƣa tǝnbiⱨ berixi bilǝn,
U ⱪupⱪuruⱪ boldi;
Huddi ⱪaƣjiraⱪ qɵllüktin yetǝklǝp mangƣandǝk,
U ularni dengiz tǝgliridin ⱪuruⱪ ɵtküzdi. ◘Mis. 14:21,22,29
10 Ularni ɵq kɵrgǝnlǝrning ⱪolidin ⱨɵrlükkǝ qiⱪardi,
Ularƣa ⱨǝmjǝmǝt bolup düxmǝn qanggilidin ⱪutⱪuzdi.
11 Yawlarni sular basti,
Ularning ⱨeqbirsi saⱪ ⱪalmidi. ◘Mis. 14:27; 15:5
12 Xundila ular Uning sɵzlirigǝ ixǝnq ⱪildi;
Ular Uni küylidi. ◘Mis. 14:31; 15:1
13 Ular Uning ⱪilƣanlirini xunqǝ tez untudi,
Nǝsiⱨǝtini kütmidi;
14 Bǝlki dalada aq kɵzlükkǝ baladǝk berildi,
Qɵl-bayawanda Tǝngrini sinidi. ◘Mis. 16:3; Qɵl. 11:4,6,33; Zǝb. 78:18; 1Kor. 10:6
15 Xunga U soriƣinini ularƣa bǝrdi,
Biraⱪ jüdǝtküqi bir kesǝlni janliriƣa tǝgküzdi. ◘Qɵl. 11:20, 33; Zǝb. 78:29-31; Yǝx. 10:16
16 Ular bargaⱨta Musaƣa ⱨǝsǝt ⱪildi,
Hudaning muⱪǝddǝs bǝndisi Ⱨarunnimu kɵrǝlmidi. ◘Qɵl. 16
17 Yǝr eqilip Datanni yutuwǝtti,
Abiramni adǝmliri bilǝn ⱪapsiwaldi. ◘Qɵl. 16:31,32,33; Ⱪan. 11:6
18 Əgǝxküqiliri arisida ot yeⱪildi;
Yalⱪun rǝzillǝrni kɵydürüwǝtti. ◘Qɵl. 16:35,46
19 Ular Ⱨorǝb teƣida mozay butni yasidi,
Ⱪuyma ⱨǝykǝlgǝ sǝjdǝ ⱪilip, ◘Mis. 32:4
20 Ɵzlirining pǝhir-xɵⱨriti bolƣuqining orniƣa,
Ot-qɵp yǝydiƣan ɵküzning süritini almaxturdi.
21 Misirda uluƣ ixlarni kɵrsǝtkǝn Nijatkari Tǝngrini ular untudi.
22 Dǝrwǝⱪǝ, Ⱨam diyarida mɵjizilǝr yaratⱪan,
Ⱪizil Dengiz boyida ⱪorⱪunqluⱪ ixlarni kɵrsǝtkǝn Hudani untudi.
23 U ularni ⱨalak ⱪilimǝn degǝnidi —
Ɵz talliƣini Musa ⱪǝⱨrini yandurux üqün Uning aldida ariqi bolup tik turmiƣan bolsa,
— Dǝrwǝⱪǝ xundaⱪ ⱪilƣan bolar idi. ◘Mis. 32:11,32; Ⱪan. 9:13,14; 10:10
24 Ular yǝnǝ güzǝl zeminni kǝmsitip rǝt ⱪildi,
Uning wǝdisigǝ ixǝnmidi; ◘Qɵl. 14:1, 2
25 Bǝlki qedirlirida ⱪaⱪxap yürüp,
Pǝrwǝrdigarning awaziƣa ⱪulaⱪ salmidi.
26 Xunga U ularƣa ⱪǝsǝm ⱪilip ⱪol kɵtürüp: —
Silǝrni qɵldǝ yiⱪitip tügǝxtürimǝn — ◘Qɵl. 14:28
27 Əwladliringlarnimu ǝllǝr arisida yiⱪitip tügǝxtürüp,
Yaⱪa yurtlar ara tarⱪitiwetimǝn» — dedi. ◘Zǝb. 44:10-14; Əz. 20:23
28 Ular Baal-Peor butⱪa ɵzini etip qoⱪunup,
Ɵlüklǝrgǝ atiƣan ⱪurbanliⱪlarni yedi. ◼«Ular Baal-Peor butⱪa ɵzini etip qoⱪunup, ɵlüklǝrgǝ atiƣan ⱪurbanliⱪlarni yedi» — «ɵlüklǝrgǝ ⱪurbanliⱪ ⱪilix», «yaƣ puritix» ⱪatarliⱪ ⱨǝrⱪandaⱪ paaliyǝtlǝr Tǝwratta ⱪǝt’iy mǝn’i ⱪilinƣan. ◘Qɵl. 25:3; 31:16; Wǝⱨ. 2:14
29 Ular ⱪilmixliri bilǝn Uning aqqiⱪini kǝltürdi,
Ular arisida waba ⱪozƣaldi;
30 Finiⱨas turdi-dǝ, ⱨɵküm yürgüzdi,
Xuning bilǝn waba tosuldi;
31 Bu ix Finiⱨasⱪa ⱨǝⱪⱪaniyǝt dǝp ⱨesablandi,
Uning nǝsligimu ǝwladidin ǝwladiƣiqǝ, ǝbǝdiy xundaⱪ ⱨesablandi.
32 Ular yǝnǝ Pǝrwǝrdigarni meribaⱨ suliri boyida ƣǝzǝpkǝ kǝltürdi,
Ularning sǝwǝbidin Musaƣimu zǝrǝr yǝtti; ◘Qɵl. 20:12; Zǝb. 95:8
33 Qünki ular uning roⱨini teriktürdi,
Uning lǝwliri bihǝstiliktǝ gǝp ⱪilip saldi. ◼«Qünki ular uning roⱨini teriktürdi» — bǝzi tǝrjimilǝrdǝ «uning roⱨi» Musaning roⱨi ǝmǝs, bǝlki Hudaning Roⱨi dǝp qüxǝndürülidu. «... Ular uning roⱨini teriktürdi, uning lǝwliri bihǝstiliktǝ gǝp ⱪilip saldi» — «Qɵl.» 20:7-13ni kɵrüng.
34 Ular Pǝrwǝrdigarning ǝmrigǝ hilapliⱪ ⱪilip,
Xu yǝrdiki ⱪowmlarni yoⱪatmidi;
35 Bǝlki yat ǝllǝr bilǝn arilixip,
Ularning ⱪiliⱪlirini ɵgǝndi; ◘Ⱨak. 2:2; 3:5, 6
36 Ularning butliriƣa qoⱪundi,
Bular ɵzlirigǝ bir tuzaⱪ bolup qiⱪti;
37 Qünki ular ɵz oƣul-ⱪizlirini soyup, jinlarƣa ⱪurbanliⱪⱪa beƣixlidi. ◘Law. 18:21; Ⱪan. 12:31; 2Pad. 16:3; 17:17; 21:6; 2Tar. 28:3; 33:6
38 Xundaⱪ ⱪilip ular bigunaⱨ ⱪanni,
Yǝni Ⱪanaandiki butlarƣa atap ⱪurbanliⱪ ⱪilip, ɵz oƣul-ⱪizlirining ⱪenini tɵkti;
Zemini ⱪanƣa bulƣinip kǝtti. ◘Qɵl. 35:33
39 Ular ɵz ⱪilmixliri bilǝn bulƣandi;
Ⱪiliⱪliri bilǝn paⱨixǝ ayaldǝk buzuldi.
40 Xunga Pǝrwǝrdigar Ɵz hǝlⱪidin ⱪattiⱪ ƣǝzǝplǝndi,
U Ɵz mirasidin yirgǝndi;
41 Ularni yat ǝllǝrning ⱪoliƣa bǝrdi,
Ularƣa ɵqmǝnlǝr ular üstidin ⱨɵkümranliⱪ ⱪildi.
42 Düxmǝnliri ularni ǝzdi,
Ular yaw ⱪoli astida egilip püküldi.
43 Kɵp ⱪetim Pǝrwǝrdigar ularni ⱪutⱪuzdi;
Biraⱪ ular bolsa, ɵz haⱨixliri bilǝn Uningƣa asiyliⱪ ⱪildi,
Ular ɵz ⱪǝbiⱨliki bilǝn pǝs ⱨalƣa qüxti.
44 Xundaⱪtimu U ularning nalǝ-pǝryadini angliƣanda,
Ularning jǝbir-japaliriƣa etibar bǝrdi;
45 Ⱨǝm ular bilǝn tüzgǝn ǝⱨdisini ǝslidi,
Zor meⱨir-xǝpⱪiti bilǝn, ƣǝzipidin yandi, ◼«Zor meⱨir-xǝpⱪiti bilǝn,...» — ibraniy tilida: «Zor meⱨir-xǝpⱪǝtliri bilǝn...».
46 U ularni sürgün ⱪilƣanlarning ⱪǝlbidǝ rǝⱨim oyƣatti.
47 Bizni ⱪutⱪuzƣaysǝn, i Pǝrwǝrdigar Hudayimiz!
Muⱪǝddǝs namingƣa tǝxǝkkür eytixⱪa,
Tǝntǝnǝ ⱪilip Seni mǝdⱨiyilǝxkǝ,
Bizni ǝllǝr arisidin yeningƣa yiƣiwalƣaysǝn! ◘1Tar. 16:35
48 Israilning Hudasi bolƣan Pǝrwǝrdigarƣa,
Əzǝldin ta ǝbǝdgiqǝ tǝxǝkkür-mǝdⱨiyǝ ⱪayturulƣay!
Pütkül hǝlⱪ «Amin» desun!
Ⱨǝmdusana! ◘1Tar. 16:36
◼106:1 «Pǝrwǝrdigar... meⱨribandur, ǝbǝdiydur Uning meⱨir-muⱨǝbbiti...» — bu küydǝ Tǝwrattiki «Mis.» 1-24-bablar, «Qɵl.» 11-17, 20-bablar, «Yǝxua», «Batur ⱨakimlar» ⱨǝm «Padixaⱨlar» degǝn ⱪisimlardiki tarih kɵzdǝ tutulidu.
◘106:1 1Tar. 16:34-36; Zǝb. 107:1; 118:1; 136:1
◼106:4 «Nijatliⱪing bilǝn yenimƣa kelip hǝwǝr alƣin!» — ibraniy tilida: «Nijatliⱪing bilǝn meni yoⱪliƣaysǝn» degǝn sɵzlǝr bilǝn ipadilinidu.
◘106:6 Law. 26:40; Yǝr. 3:25; Dan. 9:5
◘106:14 Mis. 16:3; Qɵl. 11:4,6,33; Zǝb. 78:18; 1Kor. 10:6
◘106:15 Qɵl. 11:20, 33; Zǝb. 78:29-31; Yǝx. 10:16
◘106:16 Qɵl. 16
◘106:17 Qɵl. 16:31,32,33; Ⱪan. 11:6
◘106:23 Mis. 32:11,32; Ⱪan. 9:13,14; 10:10
◘106:24 Qɵl. 14:1, 2
◘106:27 Zǝb. 44:10-14; Əz. 20:23
◼106:28 «Ular Baal-Peor butⱪa ɵzini etip qoⱪunup, ɵlüklǝrgǝ atiƣan ⱪurbanliⱪlarni yedi» — «ɵlüklǝrgǝ ⱪurbanliⱪ ⱪilix», «yaƣ puritix» ⱪatarliⱪ ⱨǝrⱪandaⱪ paaliyǝtlǝr Tǝwratta ⱪǝt’iy mǝn’i ⱪilinƣan.
◘106:28 Qɵl. 25:3; 31:16; Wǝⱨ. 2:14
◼106:33 «Qünki ular uning roⱨini teriktürdi» — bǝzi tǝrjimilǝrdǝ «uning roⱨi» Musaning roⱨi ǝmǝs, bǝlki Hudaning Roⱨi dǝp qüxǝndürülidu. «... Ular uning roⱨini teriktürdi, uning lǝwliri bihǝstiliktǝ gǝp ⱪilip saldi» — «Qɵl.» 20:7-13ni kɵrüng.
◘106:37 Law. 18:21; Ⱪan. 12:31; 2Pad. 16:3; 17:17; 21:6; 2Tar. 28:3; 33:6
◼106:45 «Zor meⱨir-xǝpⱪiti bilǝn,...» — ibraniy tilida: «Zor meⱨir-xǝpⱪǝtliri bilǝn...».