Muⱪeddes Kalam (yǝngi yeziⱪ) Rimliⱪlarƣa 14

Ⱪerindaxlar üstidin ⱨɵküm ⱪilmanglar

1 Etiⱪadi ajizlarni ⱪobul ⱪilinglar, lekin ular bilǝn pikirdǝ talax-tartix ⱪilmanglar. □

2 Birsi ⱨǝrⱪandaⱪ yemǝklikni yeyixkǝ bolidiƣiniƣa ixinidu; lekin yǝnǝ etiⱪadi ajiz birsi pǝⱪǝt kɵktatlarnila yǝydu.■ 3 Ⱨǝrⱪandaⱪ yemǝkliklǝrni yǝydiƣan kixi yemǝydiƣan kixini kǝmsitmisun; ⱨǝmdǝ bǝzi nǝrsini yemǝydiƣan kixi ⱨǝrⱪandaⱪ yemǝkliklǝrni yǝydiƣan kixi üstidin ⱨɵküm ⱪilmisun. Qünki Huda uni ⱪobul ⱪilƣan. 4 Baxⱪa birsining hizmǝtkari üstidin ⱨɵküm ⱪilƣuqi sǝn kim iding? Hizmǝtkarning tik turuxi yaki yiⱪilip ketixigǝ pǝⱪǝtla ɵz hojayini mǝs’uldur. Ⱨǝmdǝ xu hizmǝtkarmu tik turidiƣan ⱪilinidu — qünki hujayini Rǝb uni tik turƣuzuxⱪa ⱪadirdur.■

5 Mǝlum birsi mǝlum bir künni yǝnǝ bir kündin üstün kɵridu, yǝnǝ birsi ⱨǝmmǝ künni ohxax dǝp ⱪaraydu. Ⱨǝrkim ɵzining kɵzⱪarixiƣa toluⱪ ixǝnqi bolsun.□ ■ 6 Mǝlum künni ⱪǝdirlǝydiƣan kixi buning bilǝn Rǝbbining ⱨɵrmitidǝ uni ⱪǝdirlǝydu. Bir nǝrsini yǝydiƣan kiximu Rǝbbining ⱨɵrmitidǝ yǝydu, qünki u ɵz rizⱪi üqün Hudaƣa tǝxǝkkür eytidu. Mǝlum nǝrsini yemǝydiƣan kixi yemǝydiƣanliⱪi bilǝn ɵzining Rǝbbining ⱨɵrmitidǝ yemǝydu, umu xundaⱪla Hudaƣa tǝxǝkkür eytidu.■ 7 Qünki ⱨeqⱪaysimiz ɵzimiz üqün yaximaymiz wǝ ⱨeqⱪaysimiz ɵzimiz üqün ɵlmǝymiz;■ 8 Bǝlki ǝgǝr yaxisaⱪ, Rǝbbimiz üqün yaxaymiz; ɵlsǝk, Rǝbbimiz üqün ɵlimiz. Xuning üqün yaxisaⱪmu, ɵlsǝkmu Rǝbbimizgǝ mǝnsupturmiz. 9 Qünki Mǝsiⱨning ɵlüxi wǝ tirilixi dǝl xu mǝⱪsǝt bilǝn boldiki, Uning ɵlüklǝrning ⱨǝm tiriklǝrning Rǝbbi boluxi üqündur.

10 Undaⱪta, sǝn nemǝ üqün ⱪerindixing üstidin ⱨɵküm ⱪilisǝn? Yaki nemǝ üqün ⱪerindixingni mǝnsitmǝysǝn? Qünki ⱨǝmmimiz Hudaning soraⱪ tǝhti aldida turiximiz kerǝk bolidu. □ ■ 11 Qünki muⱪǝddǝs yazmilarda eytilƣinidǝk: —

«Pǝrwǝrdigar dǝyduki: —

Ɵz ⱨayatim bilǝn ⱪǝsǝm iqimǝnki,

Manga barliⱪ tizlar pükülidu,

Barliⱪ tillar Meni etirap ⱪilip mǝdⱨiyǝ oⱪuydu».□ ■

12 Xunga, ⱨǝrbirimiz Huda aldida ɵzimiz toƣruluⱪ ⱨesab berimiz.■

Ajiz ⱪerindixinglarni Huda yolidin qǝtnitip ⱪoymanglar

13 Xuning üqün, bir-birimizning üstidin ⱨɵküm ⱪilƣuqi ikkinqi biri bolmayli. Buning orniƣa xundaⱪ ⱨɵküm-ⱪararƣa kelinglarki, ⱨǝrⱪandaⱪ ⱪerindaxⱪa gunaⱨⱪa yiⱪitidiƣan bir nǝrsini yaki tuzaⱪni ⱪoymasliⱪ kerǝk. ■ 14 Rǝbbimiz Əysada bolƣanliⱪimdin xuningƣa ⱪǝt’iy ixǝndürülüp bilimǝnki, ⱨǝrⱪandaⱪ nǝrsǝ ɵzlikidin ⱨaram ǝmǝstur; lekin bir nǝrsini ⱨaram dǝp ⱪariƣan kixi üqün, u uningƣa ⱨaramdur. ■ 15 Əgǝr yemǝkliking tüpǝylidin ⱪerindixingni azabⱪa ⱪoyƣan bolsang, meⱨir-muⱨǝbbǝt yolida mangmiƣan bolisǝn. Mǝsiⱨ uning üqün Ɵz jenini pida ⱪilip ɵlgǝn, bu ⱪerindixingni yemǝkliking bilǝn nabut ⱪilma!■

16 Əmdi silǝr yahxi dǝp ⱪariƣan ixlarning yaman deyilixigǝ sǝwǝbqi bolup ⱪalmanglar. 17 Qünki Hudaning padixaⱨliⱪi yemǝk-iqmǝktǝ ǝmǝs, bǝlki Muⱪǝddǝs Roⱨta bolƣan ⱨǝⱪⱪaniyliⱪ, inaⱪliⱪ-hatirjǝmlik wǝ xadliⱪtidur. ■ 18 Bularda yaxap Mǝsiⱨkǝ hizmǝt ⱪilƣuqi kixi Hudani hursǝn ⱪilidu wǝ insanlarning tǝriplixigǝ sazawǝr bolidu.

19 Xuning üqün ɵzimizni inaⱪliⱪni ilgiri süridiƣan wǝ bir-birimizning etiⱪadini ⱪurup qiⱪidiƣan ixlarƣa atayli. □ 20 Yemǝklikni dǝp Hudaning ǝjrini nabut ⱪilmanglar. Ⱨǝmmǝ nǝrsǝ dǝrwǝⱪǝ ⱨalaldur; biraⱪ birsi yegini bilǝn etiⱪadida putlaxsa, u uningƣa yaman ⱨesablinidu. □ ■ 21 Xuning üqün gɵx yeyix, xarab iqix, xundaⱪla baxⱪa ⱨǝrⱪandaⱪ ixlarni ⱪilixing ⱪerindixingni gunaⱨⱪa teyilduridiƣan, azabⱪa ⱪoyidiƣan yaki uni ajizlaxturidiƣan bolsa, bularni ⱪilmiƣining tüzük. □ ■

22 Sening mǝlum bir ixni ⱪilixⱪa ixǝnqing barmu? Əmdi bu ixǝnq Huda bilǝn sening arangdiki ixtur. Ɵzi ⱪiliwatⱪan ixni toƣra dǝp ⱪariƣan, xuningdin wijdanimu ǝyibkǝ buyrulmiƣan kixi nemidegǝn bǝhtlik-ⱨǝ! 23 Lekin yemǝkliktin gumanlinip turup yǝnǝ xuni yegǝn kixi ǝyibkǝ buyrulidu, qünki buni ixǝnq bilǝn yemigǝn. Ixǝnqtin bolmiƣan ⱨǝrⱪandaⱪ ix gunaⱨtur.■

□14:1 «Etiⱪadi ajizlarni ⱪobul ⱪilinglar, lekin ular bilǝn pikirdǝ talax-tartix ⱪilmanglar» — ǝyni zamanda Əysa Mǝsiⱨkǝ etiⱪad ⱪilƣuqilar Yǝⱨudiylardin ⱨǝm ⱨǝrhil ƣǝyriy dinƣa ǝgǝxkǝnlǝrdin qiⱪⱪan Yǝⱨudiy ǝmǝslǝr idi. Ularning kɵp ⱪisimlirida ǝslidǝ «Hudani hursǝn ⱪilix» üqün yemǝk-iqmǝklik jǝⱨǝttǝ küqlük ⱪaidilǝr bar idi. Lekin, hux hǝwǝr bilǝn yǝtküzülgǝn wǝⱨiylǝr boyiqǝ, Huda dunyadiki barliⱪ ozuⱪluⱪ nǝrsilǝrni yaratⱪandin keyin, etiⱪadqilar ularni yeyixkǝ bolidu (mǝsilǝn, «Mar.» 7:18-23ni kɵrüng). Biraⱪ bir ⱪisim etiⱪadqilar bu yengi ǝrkinlikni toluⱪ qüxǝnmigǝn yaki uningƣa ixǝnmigǝn bolsa, kona adǝtliri boyiqǝ yaxaxni dawam ⱪilatti. Xuning bilǝn Pawlus ularni «etiⱪadi ajizlar» dǝp atidi. Ⱪiziⱪ bir yeri xuki, «etiⱪadi ajiz» adǝmning bǝzi intayin küqlük pikirliri boluxi mumkin!

■14:2 Pǝnd. 15:7

■14:4 Yaⱪ. 4:12.

□14:5 «Mǝlum birsi mǝlum bir künni yǝnǝ bir kündin üstün kɵridu, yǝnǝ birsi ⱨǝmmǝ künni ohxax dǝp ⱪaraydu. Ⱨǝrkim ɵzining kɵzⱪarixiƣa toluⱪ ixǝnqi bolsun» — etiⱪadqilarning bir ⱪismi Yǝⱨudiy bolup, ular yǝnila Tǝwratta bǝlgilǝngǝn, Yǝⱨudiylar ɵtküzüp kǝlgǝn ⱨeyt-bayramlarni tutuxⱪa, bolupmu «xabat küni» (dǝm elix küni, yǝni xǝnbǝ küni)ni tutuxⱪa adǝtlǝngǝn, xundaⱪla bularni burunⱪidǝk dawamlaxturux kerǝk, dǝytti.

■14:5 Gal. 4:10; Kol. 2:16.

■14:6 1Kor. 10:31; 1Tim. 4:3.

■14:7 2Kor. 5:15; Gal. 2:20; 1Tes. 5:10; 1Pet. 4:2.

□14:10 «Qünki ⱨǝmmimiz Hudaning soraⱪ tǝhti aldida turiximiz kerǝk bolidu» — «soraⱪ tǝhti» adǝttǝ Rim imperiyǝsidǝ ⱨǝrbir xǝⱨǝrning qong mǝydanida bolatti. Yǝrlik ǝmǝldarlar muⱨim ⱨɵkümlǝrni yaki elanlarni qiⱪirix üqün uningda olturatti. Hudaning «soraⱪ tǝhti» yaki «ⱨɵküm qiⱪirix tǝhti» aldida bolidiƣan soraⱪ bǝlkim ixǝngüqilǝrning ǝmǝllirining üstidin ⱨɵküm qiⱪirix üqünla bolidu («2Kor.» 5:10ni kɵrüng).

■14:10 Mat. 25:31; 2Kor. 5:10.

□14:11 «Pǝrwǝrdigar dǝyduki: — Ɵz ⱨayatim bilǝn ⱪǝsǝm iqimǝnki, Manga barliⱪ tizlar pükülidu, barliⱪ tillar Meni etirap ⱪilip mǝdⱨiyǝ oⱪuydu» — «Yǝx.» 45:23.

■14:11 Yǝx. 45:23; 49:18; Fil. 2:10.

■14:12 Zǝb. 62:12; Yǝr. 17:10; 32:19; Mat. 16:27; Rim. 2:6; 1Kor. 3:8; 2Kor. 5:10; Gal. 6:5; Wǝⱨ. 2:23; 22:12.

■14:13 1Kor. 10:32; 2Kor. 6:3.

■14:14 Mat. 15:11; Ros. 10:15; 1Kor. 8:4; 1Tim. 4:4.

■14:15 1Kor. 8:11.

■14:17 1Kor. 8:8.

□14:19 «Xuning üqün ɵzimizni inaⱪliⱪni ilgiri süridiƣan wǝ bir-birimizning etiⱪadini ⱪurup qiⱪidiƣan ixlarƣa atayli» — «bir-birimizning etiⱪadini ⱪurup qiⱪidiƣan» ǝyni tekistǝ «bir-birimizni ⱪurup qiⱪidiƣan» degǝn sɵzlǝr bilǝn ipadilinidu. Bu muⱨim ibarining mǝnisi toƣruluⱪ «kirix sɵz»imizni kɵrüng.

□14:20 «biraⱪ birsi yegini bilǝn etiⱪadida putlaxsa, u uningƣa yaman ⱨesablinidu» — baxⱪa birhil tǝrjimisi: «biraⱪ birsi yesǝ wǝ xunglaxⱪa baxⱪilarni (iman, wijdan tǝripidǝ) putlaxtursa, bu ix uningƣa yaman bolidu».

■14:20 Tit. 1:15.

□14:21 «azabⱪa ⱪoyidiƣan yaki uni ajizlaxturidiƣan» — bǝzi kona kɵqürmilǝrdǝ muxu sɵzlǝr tepilmaydu.

■14:21 1Kor. 8:13.

■14:23 Tit. 1:15.