Muⱪeddes Kalam (yǝngi yeziⱪ) Korintliⱪlarƣa «1» 3

1 Lekin mǝn, i ⱪerindaxlar, Roⱨⱪa tǝwǝ kixilǝrgǝ sɵz ⱪilƣandǝk silǝrgǝ sɵz ⱪilalmay keliwatimǝn; ǝksiqǝ silǝrni ǝtkǝ tǝwǝ kixilǝr, Mǝsiⱨdǝ bolƣan bowaⱪ ⱨesablap silǝrgǝ sɵzlǝxkǝ mǝjbur boldum.□ 2 Mǝn silǝrgǝ süt iqküzdüm, gɵxni yegüzmidim; qünki silǝr gɵxni ⱨǝzim ⱪilalmayttinglar, xundaⱪla ⱨazirmu tehi ⱨǝzim ⱪilalmaysilǝr;■ 3 Qünki silǝr yǝnila ǝtkǝ tǝwǝdursilǝr. Aranglarda ⱨǝsǝthorluⱪ wǝ talax-tartixlar bar bolƣaqⱪa, silǝr ǝtkǝ tǝwǝ ǝmǝsmu, insanlarqǝ mengiwatmamsilǝr?□ ■ 4 Qünki birsi «Mǝn Pawlus tǝrǝpdari», baxⱪa birsi «Mǝn Apollos tǝrǝpdari» desǝ, silǝr pǝⱪǝt insanlarning yolida mangƣan bolup ⱪalmamsilǝr?□ ■

5 Apollos degǝn kim? Pawlus kim idi? Biz pǝⱪǝt silǝrning etiⱪadinglarƣa wasitiqi bolduⱪ, halas; ⱨǝrbirimiz pǝⱪǝt Rǝb bizgǝ tǝⱪsim ⱪilƣini boyiqǝ wǝzipǝ ada ⱪilidiƣan hizmǝtkarlar, halas, xundaⱪ ǝmǝsmu?■ 6 Mǝn tiktim, Apollos suƣardi; ǝmma ɵstürgüqi bolsa Hudadur.□ ■ 7 Xunga tikküqi ⱨeqnemigǝ ⱨesab ǝmǝs, suƣarƣuqimu ⱨeqnemigǝ ⱨesab ǝmǝs, pǝⱪǝt ɵstürgüqi Huda Ɵzi ⱨǝmmidur. 8 Əmma tikküqi wǝ osa ⱪilƣuqi bolsa bir mǝⱪsǝttidur; xundaⱪtimu ⱨǝrbiri ɵz ǝjri boyiqǝ in’amini ⱪobul ⱪilidu.□ ■ 9 Qünki biz Hudaƣa tǝwǝ meⱨnǝtdaxturmiz; silǝr bolsanglar Hudaning baƣ-etizi, Hudaning ⱪuruluxisilǝr.□ ■

10 Hudaning manga tǝⱪsim ⱪilƣan meⱨir-xǝpⱪiti boyiqǝ, huddi usta memardǝk ul saldim, andin baxⱪa birsi uning üstigǝ ⱪuruwatidu. Əmma ⱨǝrbir ⱪurƣuqi ⱪandaⱪ ⱪuruwatⱪanliⱪiƣa eⱨtiyat ⱪilsun.

11 Qünki selinƣan ulni, yǝni Əysa Mǝsiⱨdin baxⱪa ⱨeqⱪandaⱪ ulni selixⱪa bolmaydu. ■ 12 Əmdi birsi bu ul üstigǝ altun, kümüx, ⱪimmǝtlik taxlar, yaƣaq, qɵplǝr, saman salsa, □ 13 ⱨǝrbirining singdürgǝn ǝjrining ⱪandaⱪliⱪi kɵrünidu; qünki xu küni uni axkarǝ ⱪilidu, qünki uning maⱨiyiti otta kɵrülidu; ot ⱨǝrbir kixining ǝjrini, ⱪandaⱪ maⱨiyǝttin bolƣanliⱪini sinaydu. □ ■ 14 Birsining ul üstigǝ ⱪurƣan ixi puhta saⱪlinip ⱪalsa, u in’amƣa erixidu; □ 15 Birsining ⱪurƣini kɵyüp kǝtsǝ, u ziyan tartidu; u ɵzi ⱪutulidu, ǝmma goya ottin ɵtüp ⱪutulƣan birsigǝ ohxap ⱪalidu. 16 Əjǝba, ɵzünglarning Hudaning ibadǝthanisi ikǝnlikinglarni wǝ Hudaning Roⱨining silǝrdǝ turƣanliⱪini bilmǝmsilǝr? ■ 17 Birsi Hudaning ibadǝthanisini harab ⱪilsa, Huda uni harab ⱪilidu; qünki Hudaning ibadǝthanisi pak-muⱪǝddǝstur, silǝr dǝl xundaⱪsilǝr.

18 Ⱨeqkim ɵz-ɵzini aldimisun; birsi ɵzini bu dǝwrdǝ dana dǝp sanisa, nadan bolup ⱪalsun; xuning bilǝn u dana bolidu. □ ■ 19-20 Qünki bu dunyadiki danaliⱪ Hudaƣa nisbǝtǝn ǝhmǝⱪliⱪtur; qünki: — «U danixmǝnlǝrni ɵz ⱨiyligǝrlikining tuziⱪiƣa alidu», dǝp wǝ yǝnǝ: «Rǝb danixmǝnlǝrning oy-hiyallirining tutami yoⱪluⱪini bilidu» dǝp pütüklüktur.□ ■

21 Xunga ⱨeqkim insan degǝnlǝrni pǝhirlinip danglimisun; qünki ⱨǝmmǝ mǝwjudatlar silǝrgǝ tǝwǝdur; 22 Pawlus bolsun, Apollos bolsun, Kefas bolsun, dunya-jaⱨan bolsun, ⱨayat bolsun, ɵlüm bolsun, ⱨazirⱪi ixlar bolsun, kǝlgüsi ixlar bolsun, ⱨǝmmisi silǝrgǝ mǝnsuptur; 23 silǝr bolsanglar Mǝsiⱨning, Mǝsiⱨ bolsa Hudaningkidur.

□3:1 «ǝtkǝ tǝwǝ kixilǝr» — (yaki «ǝtlik kixilǝr») toƣruluⱪ «Rimliⱪlarƣa»ƣa bǝrgǝn «kirix sɵz»diki «ǝt» toƣruluⱪ sɵzimizni kɵrüng. «Ətlik kixi» asasǝn hux hǝwǝrni ⱪobul ⱪilƣini bilǝn tehi ɵz gunaⱨlirining küqidin azad bolmiƣan kixidur.

■3:2 Ibr. 5:12; 1Pet. 2:2.

□3:3 «silǝr ǝtkǝ tǝwǝ ǝmǝsmu, insanlarqǝ mengiwatmamsilǝr?» — «insanlarqǝ» Hudaning yolida ǝmǝs, insaniyǝtning yolida.

■3:3 1Kor. 1:11; Gal. 5:19; Yaⱪ. 3:16.

□3:4 «pǝⱪǝt insanlarning yolida mangƣan bolup ⱪalmamsilǝr?» — demǝk, Hudani tonumiƣan, Roⱨtin tuƣulmiƣan, tehiqǝ Adǝm’atimizning ailisigǝ tǝwǝ bolƣan, adǝttiki gunaⱨkar insanlarƣa ohxax.

■3:4 1Kor. 1:12.

■3:5 Ros. 18:24; 1Kor. 1:12; 16:12.

□3:6 «... Apollos suƣardi» — Korint xǝⱨiridiki jamaǝt Pawlusning sɵzliri arⱪiliⱪ etiⱪad ⱪilƣanidi; keyin Apollos Korint xǝⱨirigǝ berip ixǝngüqilǝrni Tǝwrat-Zǝbur toƣrisidiki bilimliri arⱪiliⱪ zor dǝrijidǝ riƣbǝtlǝndürgǝnidi («Ros.» 18-bab).

■3:6 Ros. 18:26; 19:1.

□3:8 «bir mǝⱪsǝttidur» — grek tilida «birdur».

■3:8 Zǝb. 62:12; Yǝr. 17:10; 32:19; Mat. 16:27; Rim. 2:6; 14:12; 2Kor. 5:10; Gal. 6:5; Wǝⱨ. 2:23; 22:12.

□3:9 «biz Hudaƣa tǝwǝ meⱨnǝtdaxturmiz» — baxⱪa birhil qüxǝndürülüxi: «biz Huda bilǝn meⱨnǝtdaxturmiz» («2Kor.» 5:20, 6:1nimu kɵrüng).

■3:9 2Kor. 6:1; Əf. 2:20; Kol. 2:7; 1Pet. 2:5.

■3:11 Yǝx. 28:16; Mat. 16:18.

□3:12 «birsi bu ul üstigǝ... ⱪimmǝtlik taxlar .. salsa» — «ⱪimmǝtlik taxlar» degǝn ohxitixning muxu yǝrdǝ omumiy kɵrsǝtkini bǝlkim yaⱪut-gɵⱨǝrlǝrni ǝmǝs, bǝlki oyulƣan, binani puhta ⱪilidiƣan ⱪattiⱪ qidamliⱪ taxlarni kɵrsǝtsǝ kerǝk. Pawlus buning kɵqmǝ mǝnisini oⱪurmǝnlǝrning oylinixiƣa ⱪalduridu!

□3:13 «xu küni uni axkarǝ ⱪilidu» — «xu küni» Mǝsiⱨ Əysa zeminƣa ⱪaytidiƣan künidur.

■3:13 Yǝx. 8:20; 48:10; Yǝr. 23:29; 1Pet. 1:7; 4:12.

□3:14 «Birsining ul üstigǝ ⱪurƣan Ixi puhta saⱪlinip ⱪalsa...» — demǝk, «bir kixining ul üstigǝ ⱪoyƣan materiyalliri otⱪa bǝrdaxliⱪ berǝlisǝ,...».

■3:16 1Kor. 6:19; 2Kor. 6:16; Ibr. 3:6; 1Pet. 2:5.

□3:18 «birsi ɵzini bu dǝwrdǝ dana dǝp sanisa, nadan bolup ⱪalsun» — Mǝsiⱨning «Mat.» 18:1-4dǝ wǝ «Mar.» 10:13-16dǝ eytⱪan sɵzlirini kɵrüng.

■3:18 Pǝnd. 3:7; Yǝx. 5:21.

□3:19-20 «U danixmǝnlǝrni ɵz ⱨiyligǝrlikining tuziⱪiƣa alidu» — «Ayup» 5:13. «Rǝb danixmǝnlǝrning oy-hiyallirining tutami yoⱪluⱪini bilidu» — «Zǝb.» 94:11.

■3:19-20 Ayup 5:13; Zǝb. 94:11.