Muⱪeddes Kalam (yǝngi yeziⱪ) Korintliⱪlarƣa «1» 9

Pawlusning kɵp rosulluⱪ ⱨǝⱪ-ⱨoⱪuⱪlirini ixlǝtmǝsliki

1 Mǝn ǝrkin ǝmǝsmu? Mǝn rosul ǝmǝsmu? Mǝn Rǝbbimiz Əysa Mǝsiⱨni kɵrgǝn ǝmǝsmu? Silǝr ɵzünglar mening Rǝbdǝ bolƣan ǝjrim ǝmǝsmu?□ ■ 2 Əgǝr baxⱪilarƣa nisbǝtǝn rosul dǝp ⱨesablanmisam, mǝn ⱨeq bolmiƣanda silǝrgǝ rosul boldum; qünki ɵzünglar Rǝbdǝ mening rosul bolƣanliⱪimni tǝstiⱪliƣan mɵⱨürdursilǝr.

3 Meni sürüxtǝ ⱪilmaⱪqi bolƣanlarƣa bolƣan jawabim mundaⱪ: —□ 4 Bizlǝrning yǝp-iqixkǝ ⱨoⱪuⱪimiz bar ǝmǝsmu?□ ■ 5 Bizning baxⱪa rosullar, Rǝbning Ɵz iniliri wǝ Kefasning ⱪilƣinidǝk, etiⱪadqi bir singilni ǝmrimizgǝ elip sǝpǝrdǝ ⱨǝmraⱨ ⱪilip yürüx ⱨǝⱪⱪimiz yoⱪmu?□ ■ 6 Əjǝba, pǝⱪǝt Barnabas bilǝn meningla ǝmgǝk ⱪilmasliⱪⱪa ⱨoⱪuⱪimiz yoⱪmu? 7 Kim hirajǝtni ɵzi tɵlǝp ǝskǝr bolup jǝnggǝ qiⱪidu? Kim üzümzar bina ⱪilip uning mewisidin yemǝydu? Ⱪaysi pada baⱪⱪuqi padining sütidin iqmǝydu?■ 8 Bu degǝnlirim pǝⱪǝt insaniy kɵzⱪarax boyiqǝ eytilƣanmu? Tǝwrat-ⱪanunning ɵzidimu ohxax deyilgǝn ǝmǝsmu?! 9 Qünki Musaƣa qüxürülgǝn ⱪanunda: «Haman tǝpkǝn ɵküzning aƣziƣa kɵxǝk salma» dǝp pütülgǝndur. Huda ɵküzlǝrgila kɵyüngǝnmu, □ ■ 10 yaki buni pǝⱪǝt bizlǝrni dǝp eytⱪanmu? Xübⱨisizki, bu sɵzlǝr bizlǝr üqün pütülgǝndur; xuning üqün yǝr ⱨǝydigüqi ümidtǝ ⱨǝydixigǝ tegixlik, xundaⱪla haman tǝpküqimu ⱨosuldin bǝⱨrimǝn bolux ümididǝ ixlǝxkǝ tegixliktur. □ 11 Biz silǝrgǝ roⱨiy bǝht-bǝrikǝtlǝrni terip, silǝrdin maddiy jǝⱨǝttin yiƣiwalsaⱪ bu qǝktin exip kǝtkǝnlik bolamdu? ■ 12 Baxⱪa hizmǝtqilǝr silǝrdǝ muxu ⱨoⱪuⱪni ixlǝtkǝn yǝrdǝ, biz xundaⱪ ⱪilsaⱪ tehimu bolidiƣu? Əmma Mǝsiⱨning hux hǝwirigǝ ⱨeq tosalƣu bolmisun dǝp, biz bu ⱨoⱪuⱪni ⱨeqⱪaqan ixlitip baⱪmiduⱪ; ǝksiqǝ, ⱨǝrⱪandaⱪ ixlarƣa qidap keliwatimiz. □ ■ 13 Ibadǝthanidiki muⱪǝddǝs ixlar üqün ixligüqilǝrning ibadǝthaniƣa atalƣan ⱨǝdiyǝlǝrdin yǝydiƣanliⱪini, ⱪurbangaⱨta hizmǝt ⱪiliwatⱪanlarning ⱪurbanliⱪlardin ülüxini alidiƣanliⱪini bilmǝmsilǝr? ■ 14 Xuningƣa ohxax, Rǝb hux hǝwǝrni jakarliƣuqilarning jeni hux hǝwǝrdin beⱪilsun dǝp bekitkǝndur.□ ■

15 Əmma mǝn bolsam bu ⱨoⱪuⱪlarning ⱨeqⱪaysisini ixlitip baⱪmidim. Ⱨǝm ⱨazirmu muxu ⱨoⱪuⱪtin padilinay dǝp muxularni yeziwatⱪinim yoⱪ! Qünki mǝn baxⱪilarning meni bu pǝhirlinidiƣanlirimdin mǝⱨrum ⱪilƣinidin kɵrǝ ɵlginim tüzük! □ 16 Qünki mening hux hǝwǝrni jakarliximda pǝhirlǝngüdǝk ix yoⱪ; qünki uning mǝjburiyiti meni besip turidu; hux hǝwǝrni jakarlimisam ⱨalimƣa way! 17 Qünki ǝgǝr uni halis ⱪilsam, buningdin manga in’am bolidu; ǝmma ɵz ihtiyarim bilǝn bolmisa, bu pǝⱪǝt mening ƣojidarliⱪ burqini ada ⱪilƣinim bolidu, halas.

18 Xundaⱪ ikǝn, mening in’amim zadi nemǝ bolidu? Mening in’amim dǝl xuki, hux hǝwǝr jakarliƣinimda mǝn hux hǝwǝrgǝ kixilǝrni ⱨǝⱪsiz erixtürimǝn — demǝk, in’amim hux hǝwǝr yǝtküzüxtiki tegixliⱪ ⱨǝⱪ elix ⱨoⱪuⱪlirimni ⱨeq ixlǝtmǝslikimdin ibarǝttur.

19 Qünki ⱨǝmmǝ adǝmning ilkidin ǝrkin bolup, ɵzümni kɵpqilikkǝ ⱪul ⱪildim; xu yol bilǝn tehimu kɵprǝk adǝmlǝrni ⱪayil ⱪilip ⱪutⱪuzsam dǝymǝn. 20 Yǝⱨudiylarni ⱪayil ⱪilip ⱪutⱪuzux üqün Yǝⱨudiylarƣa nisbǝtǝn Yǝⱨudiyƣa ohxax boldum; Tǝwrat ⱪanuni astida turƣanlarni ⱪayil ⱪilip ⱪutⱪuzux üqün (Tǝwrat ⱪanuni astida turƣan bolmisammu) Tǝwrat ⱪanuni astida turƣanlarƣa nisbǝtǝn Tǝwrat ⱪanuni astida turƣanƣa ohxax boldum; ■ 21 Tǝwrat ⱪanunida bolmiƣanlarni ⱪayil ⱪilip ⱪutⱪuzux üqün Tǝwrat ⱪanunida bolmiƣanlarƣa nisbǝtǝn (Huda aldida ⱪanunsiz bolmay, bǝlki Mǝsiⱨning ⱪanuniƣa boysunuxum bilǝn) mǝn Tǝwrat ⱪanunida bolmiƣanlarƣa ohxax boldum; □ ■ 22 ajizlarni ⱪayil ⱪilip ⱪutⱪuzux üqün ajizlarƣa ɵzüm ajizdǝk boldum; mumkin ⱪǝdǝr kɵprǝk adǝmni ⱪutⱪuzux üqün mǝn ⱨǝrⱪandaⱪ adǝmgǝ ⱪarita xundaⱪ adǝm boldum. □ ■ 23 Ɵzümning hux hǝwǝrdin nesiwǝm boluxi üqün uni dǝp ⱨǝmmǝ ixni ⱪilimǝn.

24 Bǝygigǝ qüxkǝnlǝrning ⱨǝmmisi yügürixidu, ǝmma pǝⱪǝt birila mukapatⱪa erixidiƣinini bilmǝmsilǝr? Ƣǝlibǝ ⱪazinix üqün yügürünglar. ■ 25 Musabiⱪidǝ elixⱪuqilarning ⱨǝmmisi ɵzini ⱨǝr jǝⱨǝttin tizginlǝydu; ular pǝⱪǝt bir qirip ketidiƣan tajƣa erixix üqün xundaⱪ ⱪilidu, ǝmma biz bolsaⱪ qirimas taj üqün xundaⱪ ⱪilimiz. □ ■ 26 Xunga mǝn nixansiz adǝmdǝk yügürüwatmaymǝn; muxt atsam ⱨawaƣa atidiƣan adǝmdǝk bolmaymǝn. 27 Uning orniƣa mǝn ɵz tenimni urup ɵzümgǝ kɵndürüp, uni ɵzümgǝ ⱪul ⱪilimǝn; undaⱪ ⱪilmiƣanda, baxⱪilarƣa tǝlim jakarlap turup ɵzüm layaⱪǝtlik bolmay ⱪelixim mumkin.

□9:1 «Mǝn ǝrkin ǝmǝsmu? Mǝn rosul ǝmǝsmu? Mǝn Rǝbbimiz Əysa Mǝsiⱨni kɵrgǝn ǝmǝsmu? Silǝr ɵzünglar mening Rǝbdǝ bolƣan ǝjrim ǝmǝsmu?» — Pawlus bu babta bǝzi adǝmlǝrning uningƣa «uni ⱪil, buni ⱪil» deyixigǝ «mǝn ǝrkin adǝm» dǝp jawab beridu.

■9:1 Ros. 9:3,17; 22:14,18; 23:11; 1Kor. 4:15; 15:8; 2Kor. 12:2.

□9:3 «Meni sürüxtǝ ⱪilmaⱪqi bolƣanlar...» — bu sɵz Korint jamaitidǝ, Pawlus ⱨǝⱪiⱪiy rosul ǝmǝs, dǝp yürgǝn bǝzi adǝmlǝrni kɵrsitidu.

□9:4 «Bizlǝrning yǝp-iqixkǝ ⱨoⱪuⱪimiz bar ǝmǝsmu?» — rosullar hux hǝwǝrni tarⱪitix hizmitigǝ alaⱨidǝ ayrilip qiⱪⱪaqⱪa, jamaǝtlǝrdin yemǝk-iqmǝk jǝⱨǝttǝ, yǝni iⱪtisadiy jǝⱨǝttiki yardǝmgǝ erixixkǝ ⱨoⱪuⱪluⱪtur. Əmma Pawlus wǝ hizmǝtdixi Barnabas Korint xǝⱨiridǝ xundaⱪ ⱨoⱪuⱪni ixlǝtmigǝn. Keyinki ayǝtlǝrni kɵrüng.

■9:4 1Kor. 9:14; 1Tes. 2:6; 2Tes. 3:9.

□9:5 «Bizning baxⱪa rosullar, Rǝbning Ɵz iniliri wǝ Kefasning ⱪilƣinidǝk, etiⱪadqi bir singilni ǝmrimizgǝ elip sǝpǝrdǝ ⱨǝmraⱨ ⱪilip yürüx ⱨǝⱪⱪimiz yoⱪmu?» — demǝk, rosullar ɵzliri wǝ bala-qaⱪilirimu jamaǝtning iⱪtisadiy yardimigǝ ⱨoⱪuⱪluⱪtur.

■9:5 Mat. 8:14.

■9:7 Yⱨ. 21:15; 1Kor. 3:6, 7, 8; 2Kor. 10:4; 1Pet. 5:2.

□9:9 «Haman tǝpkǝn ɵküzning aƣziƣa kɵxǝk salma» — «Ⱪan.» 25:4.

■9:9 Ⱪan. 25:4; 1Tim. 5:18.

□9:10 «Xuning üqün yǝr ⱨǝydigüqi ümidtǝ ⱨǝydixigǝ tegixlik, xundaⱪla haman tǝpküqimu ⱨosuldin bǝⱨrimǝn bolux ümididǝ ixlǝxkǝ tegixliktur» — «Am.» 9:13.

■9:11 Rim. 15:27; Gal. 6:6.

□9:12 «... Mǝsiⱨning hux hǝwirigǝ ⱨeq tosalƣu bolmisun dǝp, biz bu ⱨoⱪuⱪni ⱨeqⱪaqan ixlitip baⱪmiduⱪ; ǝksiqǝ, ⱨǝrⱪandaⱪ ixlarƣa qidap keliwatimiz» — ƣǝlitǝ yeri xuki, bǝzilǝr «Pawlus wǝ Barnabas ⱨǝⱪiⱪiy rosullar ǝmǝs, qünki ular bizdin pul sorap baⱪmiƣan!» degǝn.

■9:12 Ros. 20:33; 2Kor. 11:9; 12:13.

■9:13 Ⱪan. 18:1.

□9:14 «... Hux hǝwǝrni jakarliƣuqilarning jeni hux hǝwǝrdin beⱪilsun» — demǝk, hux hǝwǝrni ⱪobul ⱪilƣanlar tǝripidin ⱪamdalsun.

■9:14 Law. 19:13; Ⱪan. 24:14; 25:4; Mat. 10:10; Luⱪa 10:7; 1Tim. 5:18.

□9:15 «mǝn baxⱪilarning meni bu pǝhirlinidiƣanlirimdin mǝⱨrum ⱪilƣinidin kɵrǝ ɵlginim tüzük!» — «bu pǝhirlǝnginim» dǝl uning hux hǝwǝrni ⱨeqⱪandaⱪ in’am-ⱨǝdiyǝni ⱪobul ⱪilmay jakarliƣanliⱪini kɵrsitidu.

■9:20 Ros. 16:3; 18:18; 21:23.

□9:21 «Tǝwrat ⱪanunida bolmiƣanlar» — demǝk, Yǝⱨudiy ǝmǝslǝr. Ular Tǝwrat ⱪanunini bilmǝydu yaki uni etirap ⱪilmiƣanlardur. «Mǝsiⱨning ⱪanuni» — Muⱪǝddǝs Roⱨta yaxap «Pǝrwǝrdigar Hudayingni pütün ⱪǝlbing bilǝn, pütün jening bilǝn wǝ pütün küqüng bilǝn sɵygin» wǝ «ⱪoxnangni ɵzüngni sɵygǝndǝk sɵygin» degǝndin ibarǝt, ǝlwǝttǝ.

■9:21 Gal. 2:3.

□9:22 «ajizlarni ⱪayil ⱪilip ⱪutⱪuzux üqün ajizlarƣa ɵzüm ajizdǝk boldum» — «ajizlar» bǝlkim Huda toƣrisidiki bilimni tonup yǝtmigǝnliktin wijdani asanla azablinidiƣan etiⱪadqilarni, yaki etiⱪadi küqlük ǝmǝslǝrni kɵrsitidu.

■9:22 Rim. 15:1; 1Kor. 10:33; Gal. 6:1.

■9:24 Gal. 2:2; 5:7; Fil. 2:16; 2Tim. 4:7; Ibr. 6:18.

□9:25 «Musabiⱪidǝ elixⱪuqilarning ⱨǝmmisi ɵzini ⱨǝr jǝⱨǝttin tizginlǝydu; ular pǝⱪǝt bir qirip ketidiƣan tajƣa erixix üqün xundaⱪ ⱪilidu...» — ǝslidiki «Olimpiya»diki ƣaliblar yopurmaⱪ-güllǝrdin yasalƣan tajƣa erixǝtti.

■9:25 2Tim. 2:4; 4:7,8; 1Pet. 4:1; 5:4.